ފާއިތުވި އަހަރު މާލެ ސިޓީ ޕޮލިހަށް ހުށަހެޅުނު އެކި މައްސަލަތަކާ ގުޅިގެން ކޮށްފައިވާ މަސައްކަތްތަކުން 19.2 މިލިއަން ރުފިޔާއަށް ވުރެ ގިނަ ތަކެތި ރިކަވާކޮށްފައިވާކަން ފުލުހުންގެ ތަފާސް ހިސާބުތަކުން ދައްކައިފިއެވެ.
ފުލުހުން މިއަދު ވަނީ މާލެ ޕޮލިހުގައި ހިމެނޭ މާލެ ފްރަންޓްލައިން ޕޮލިސިން، ތިލަމާލެ ޕޮލިސް އަދި ޓްރެފިކް ޕޮލިސް އެންޑް ރޯޑް މެނޭޖްމަންޓުގެ މިދިޔަ އަހަރުގެ ތަފާސްހިސާބުތައް އާންމުކޮށްފަ އެވެ.
އެގޮތުން މިދިޔަ އަހަރު ޖުމްލަ 1،653 އައިޓަމެއް ރިކަވާކޮށްފައިވާއިރު، އެ ތަކެތީގެ ޖުމްލަ އަގު 19.2 މިލިއަން ރުފިޔާ އަށް ވުރެ ގިނަ އެވެ.
ރިކަވާކޮށްފައިވާ ތަކެތީގެ ތެރޭގައި 206 މޯބައިލް ފޯނު (1.983،564.79 ރުފިޔާ)، 253 މޮޓޯ ސައިކަލް (11،489،400 ރުފިޔާ)، 107 އިލެކްޓްރޯނިކްސް އައިޓަމް (986،843.42 ރުފިޔާ) އާއި އެހެނިހެން ތަކެތީގެ ގޮތުގައި ޖުމްލަ 333 އައިޓަމް (551،206.62 ރުފިޔާ) އާއި 374 މައްސަލައެއްގައި ހިމެނޭ 3،582،837.11 ރުފިޔާގެ ނަގުދު ފައިސާ އަދި އެހެނިހެން 380 އައިޓަމް (615،813.56 ރުފިޔާ) ހިމެނެ އެވެ.
އަދި ހުސްވި އަހަރު މާލެ ސިޓީ ފުލުހަށް ވޮލިއުމް ކްރައިމްގެ ޖުމްލަ 5242 މައްސަލައެއް ހުށަހެޅިފައިވާކަމަށް ފުލުހުންގެ އިދާރައިން ވަނީ ހާމަކޮށްފައެވެ. އޭގެތެރޭގައި ހިމެނެނީ ވައްކަމުގެ 2،290 މައްސަލައާއި، އެކްސިޑެންޓުގެ 2،025، ފޭރުމުގެ 414، އަދި މަސްތުވާތަކެތީގެ 236 މައްސަލައާއި މާރާމާރީގެ 358 މައްސަލައެވެ.
ހަމައެހެންމެ މާލެ ސިޓީ ޕޮލިހުން ކޮށްފައިވާ ތަހުގީގުތަކުގެ ތަފާސްހިސާބުތަކަށް ބަލާއިރު ޖުމްލަ 9،154 މައްސަލައެއް ތަހުގީގުކޮށްފައިވާއިރު އޭގެތެރެއިން ކޭސްކޮށްގެން 7،157 މައްސަލައެއް ތަހުގީގުކޮށް، 6،645 މައްސަލައެއް ފައިލްކުރިއިރު، 64 މައްސަލަ ޕީޖީ އޮފީހަށް ވަނީ ފޮޮނުވާފައިވެއެވެ. މި އިންސިޑެންޓުތަކުގައި ޖުމްލަ 1000 މީހުން ފުލުހުންގެ ބެލުމުގެ ދަށަށް ގެނެސްފައިވާއިރު އޭގެ ތެރޭގައި ހައްޔަރުކޮށްފައިވަނީ 805 މީހަކު ކަމަށް ފުލުހުން ހާމަކޮށްފައިވެއެވެ.
މީގެ އިތުރުންވެސް 2024 ވަނަ އަހަރު މާލެ ސިޓީ ޕޮލިހުގެ ނެއިބާހުޑް ޕޮލިސިންގެ މަސައްކަތްތަކަށް ބަލާއިރު، ޖުމްލަ 681 ހައުސް ވިޒިޓް ޕްރޮގްރާމް ކުރިއަށް ގެންގޮސްފައިވާކަމަށާއި ވިޔަފާރިތަކަށް ޒިޔާރަތްކުރުމުގެ 1،101 ޕްރޮގްރާމް ހިންގާފައިވާއިރު، 3،221 ޕަބްލިކް އިންޓަރެކްޝަން އަދި ކުށްމަދު ކުރުމުގެ 97 ހަރަކާތް ކުރިއަށް ގެންގޮސްފައިވާކަމަށް ވެސް ފުލުހުންގެ ތަފާސް ހިސާބުތަކުން ދައްކައެވެ.
އަދި އާންމު ކަންބޮޑުވުމުގެ 907 މައްސަލަ ހައްލުކޮށް، ވެމްކޯއާ ގުޅިގެން 241 ކުނީގެ މައްސަލަ ހައްލުކޮށްފައިވެއެވެ. ހަަމއެހެންމެ ސިޓީ ކައުންސިލާ ގުޅިގެން 153 މުނިސިޕަލް މައްސަލައެއް ހައްލުކޮށް، 142 ޓްރެފިކް މައްސަލައެއް ވެސް ހައްލުކޮށްފައިވެއެވެ.
މީގެއިތުރުން އާންމު ރައްޔިތުން ހޭލުންތެރިކުރުމަށްޓަކައި މާލެ ސިޓީ ޕޮލިހުން ކޮށްފައިވާ މަސައްކަތްތަކަށް ބަލާއިރު، ފާއިތުވި އަހަރު ބެލެނިވެރިންނަށް އަމާޒުކޮށްގެން 10 ޕްރޮގްރާމެއް ހިންގައި، ދަރިވަރުންނާއި ޓްރެފިކް މޮނީޓަރުންނަށް 53 ޕްރޮގްރާމެއް ހިންގާފައިވާއިރު، ކުންފުނި އަދި ސަރުކާރު އޮފީސްތަކަށް އަމާޒުކޮށްގެން 34 ޕްރޮގްރާމެއް ހިންގާފައިވެއެވެ.
އަދި ފުލުހުންނަށް އަމާޒުކޮށްގެން 17 ޕްރޮގްރާމެއް ހިންގާފައިވާއިރު، ޓެކްސީ ޑްރައިވަރުންނަށް 8 ޕްރޮގްރާމެއް ހިންގާފައިވެއެވެ. އަދި ކުޑަކުދިންގެ ހަވީރުގެ 35 ހަވީރެއްގައި ބައިވެރިވެ ހޭލުންތެރިކުރުމަށް މައުލޫމާތު ދީފައިވާއިރު ޓީވީ އަދި ރޭޑިއޯ މެދުވެރިކޮށް 17 ޕްރޮގްރާމެއްގައި މައުލޫމާތު ހިއްސާކޮށްފައިވެއެވެ. މި ޕްރޮގްރާމްތަކުން ޖުމްލަ 36،104 މީހުންނަށް މައުލޫމާތު ހިއްސާކުރެވިފައިވާކަމަށް ފުލުހުންގެ އިދާރާއިން ހާމަ ކޮށްފައި ވެއެވެ.
