ދެކުނު އޭޝިއާ ސަރަހައްދުގެ އެންމެ ބާރުގަދަ ޕާސްޕޯޓުގެ ޝަރަފު ރާއްޖެއިން އަނެއްކާވެސް ދަމަހައްޓައިފިއެވެ.
ވިސާއާ ނުލައި އެތެރެވެވޭނެ ގައުމުތަކުގެ އަދަދަށް ބަލާ ޕާސްޕޯޓްގެ ވަރުގަދަކަން ދެނެގަންނަ ހެންލީ ޕާސްޕޯޓް ރޭންކިން އިން އާންމު ކުރި ރިޕޯޓުން ބައިނަލްއަގްވާމީ ލިސްޓުގައި ރާއްޖެ އޮތީ 53 ވަނައިގައެވެ. ރާއްޖޭގެ ޕާސްޕޯޓުގައި ވިސާއާ ނުލައި 94 ގައުމަށް ދަތުރުކުރެވެ އެވެ.
މިދިޔަ އަހަރު ރާއްޖެ އޮތީ ޕާސްޕޯޓް ރޭންކިންގެ 58 ވަނާގައި އެވެ. މި ސަރަހައްދުގައި ރާއްޖެއާ އެންމެ ގާތަށްވެސް ރޭންކިން ގައި އޮތީ އިންޑިއާ އެވެ. އިންޑިއާ 85 ވަނާގައި އޮތްއިރު، ސްރިލަންކާ އަށް ލިބުނީ ރޭންކިންގެ 96 ވަނަ އެވެ. ބޫޓާން ރޭންކިންގެ 90 ވަނާގައި ހިމެނުނުއިރު އެ ގައުމަށް ވިސާއާއި ނުލާ 52 ގައުމަކަށް ދަތުރުކުރެވެއެވެ.
101 ވަނައިގައި އޮތް ނޭޕާލް އަށް ވިސާއާއި ނުލާ 39 ގައުމަކަށް ދަތުރު ކުރެވޭއިރު ޕާކިސްތާނު ހިމެނެނީ ރޭންކިންގެ 103 ވަނައިގައެވެ. އެ ގައުމުން ވިސާއާ ނުލައި 33 ގައުމަކަށް ދަތުރުކުރެވެއެވެ.
ރޭންކިންގެ އެންމެ ކުރީގައި އޮތީ ސިންގަޕޫރު، ޖަޕާން، ފިންލޭންޑް އަދި ފްރާންސުގެ އިތުރުން ޖަރުމަން އެވެ. ވިސާއާ ނުލައި ސިންގަޕޫރު ޕާސްޕޯޓުގައި 195 ގައުމަކަށް ދަތުރުކުރެވޭއިރު، ޖަޕާނު ޕާސްޕޯޓުގައި ވިސާއާ ނުލައި ދަތުރުކުރެވެނީ 193 ގައުމަކަށެވެ.
ލިސްޓުގެ ފަހަތުން ތިންވަނަައިގައި އިރާގު އޮތް އިރު ފަހަތުން ދެވަނައިގައި އޮތީ ސީރިއާއެވެ. އަދި ލިސްޓުގެ އެންމެ ފުލުގައި އޮތީ އަފްގާނިސްތާނެވެ.
