ފުޅާ ދާއިރާއެއްގައި، މަސްތުވާތަކެތި ވިއްކާ މަނީ ލޯންޑިން ކުރި ކަމުގެ ތުހުމަތުގައި ހައްޔަރު ކުރި ދެމީހުން ހައިކޯޓުން ދޫކޮށްލާފައި ވަނިކޮށް، އަލުން ހައްޔަރުކުރުމަށް ކްރިމިނަލް ކޯޓުން އަމުރެއް ނެރެފިއެވެ.
މިދިޔަ ޑިސެމްބަރު މަހު މައްސަލާގައި ހައްޔަރުކޮށްފައިވަނީ ޏ. ފުވައްމުލަކު ދޫޑިގަން، ކަރަންކާވިލާ އަހުމަދު ނިއުޝާު(34އ) އަދި ޏ. ފުވައްމުލަކު ދޫޑިގަން، ޒަމާނީގެ ހަސަން އާޒިމް (29އ)އެވެ.
އެ ދެމީހުންގެ މައްޗަށް މަސްތުވާތަކެއްޗާއި މަނީ ލޯންޑަރިންގެ ކުށުގެ ދައުވާ އުފުލާފައިވާއިރު މިމަހުގެ 9 ވަނަ ދުވަހު ހައިކޯޓުން ވަނީ އެ ދެމީހުން ވެސް ދޫކޮށްލާފައެވެ. ނަމަވެސް އެ ދެމީހުން އަލުން ހައްޔަރުކުރުމަށް ކްރިމިނަލް ކޯޓުން ނެރުނު އަމުރުގައި ވަނީ އެ މައްސަލައާ ގުޅިގެން އެ ދެމީހުން ޝަރީއަތް ނިމެންދެން ބަންދުގައި ބަހައްޓަން ޏ. ފުވައްމުލަކު ކޯޓުން ނެރުނު އަމުރު ރާއްޖޭގެ ހައިކޯޓުން ބާތިލުކުރި ނަމަވެސް، އައު އަމުރެއްގެ ދަށުން އެ ދެމީހުން އަލުން ހައްޔަރުކޮށް ބަންދުކުރުމަށް ހުރަހެއް އޮތްކަމަށް ނުފެންނަ ކަމަށެވެ.
ކްރިމިނަލް ކޯޓުން އަމުރުގައިވަނީ އިއްޔެއިން ފެށިގެން ހަތް ދުވަސް ވަންދެން އެ ދެމީހުން ކަސްޓޯޑިއަލް ޖަލެއްގައި ބަންދުކުރުމަށް އަމުރުކޮށްފައެވެ.
