މާލޭ ގެއެއްގެ 6 ވަނަ ބުރީގެ ބެލްކަނީގައި ޖަހާފައި ހުރި ބިއްލޫރިގަނޑެއް ވެއްޓި، ފުލުހަކަށް އަނިޔާވެއްޖެއެވެ.
ފުލުހުން ބުނީ މި ހާދިސާ ހިނގާފައި ވަނީ މިއަދު މެންދުރުފަހު 15:30 އެހާއިރު ކަމަށެވެ. މި ހާދިސާގައި ފުލުސް މީހާއަށް މާބޮޑު އަނިޔާތަކެއް ލިބިފައި ނުވި ނަމަވެސް އޭނާއަށް ލިބުނު ޒަހަމްތަކަށް އައިޖީއެމް ހޮސްޕިޓަލުގައި ވަނީ ފަރުވާދީފައެވެ.
"ދަ ޕްރެސް" އަށް އެނގިފައިވާ ގޮތުން އެ ހާދިސާ ހިނގި ވަގުތު ފުލުސް މީހާ ހުރީ ފޯނު ކޯލެއްގައެވެ. އަދި އޭނާއަށް މާބޮޑު އަނިޔާތަކެއް ލިބިފައި ނުވަނީ ބިއްލޫރިގަނޑު ވެއްޓުނު ވަގުތު ފުރަތަމަ ޖެހިފައި ވަނީ މަގުމަތީގައި ހުރި ހޮޅިދަނޑިއެއްގައި ކަމުންނެވެ. ހުރަހެއް ނެތި ބިއްލޫރިގަނޑު އޭނާ ގައި މައްޗަށް ވެއްޓުން ނަމަ ބޮޑެތި އަނިޔާތަކެއް ލިބުމަކީ އެކަށީގެންވާ ކަމެކެވެ.
މަގުމައްޗަށް ވެއްޓިފައި ވަނީ ބެލްކަނީގައި ޖަހާފައި ހުރި ތިން ބިއްލޫރިގަނޑުގެ ތެރެއިން އެއް ބިއްލޫރި ގަނޑެވެ.
އުސް އިމާރާތްތަކުންނާއި މަރާމާތު ކުރަމުންދާ އިމާރާތްތަކުން މީގެ ކުރިންވެސް މިފަދަ ހާދިސާތައް ހިނގާފައި ވެއެވެ. އެގޮތުން 2017 އަހަރު ވެސް ވަނީ އިމާރާތެއްގެ މަތިން ވެއްޓުނު ސިމެންތި ބަސްތާއަކުން ޖެހި ބަންގްލަދޭޝްގެ 7 އަހަރުގެ އަންހެން ކުއްޖަކު ނިޔާވެފައެވެ.
