މާލޭގެ ހެންވޭރުގައި ހިންގާ ގެސްޓް ހައުސްއެއްގެ ފާހާނާ ތެރޭގައި މަރުވެފައި އޮތް ދިވެއްސަކު ފެނިއްޖެއެވެ.
މަރުވެފައި ވަނީ، އުމުރުން 59 އަހަރުގެ އައްޑޫ ސިޓީ، ހުޅުދޫ، ބޮކަރުމާގޭ، އަބްދުﷲ ޒަކީއެވެ.
ފުލުހުން ބުނީ، ހެންވޭރުގައި ހިންގާ ގެސްޓް ހައުސެއްގެ ފާހާނާ ތެރޭގައި މީހަކު ވެއްޓިފައި އޮތް ކަމުގެ މައުލޫމާތު މިއަދު މެންދުރު ފަހު 2:04 ހާއިރު ފުުހުންނަށް ރިޕޯޓްކޮށްފައިވާ ކަމަށެވެ. އަދި އެ މީހާ ހޮސްޕިޓަލަށް ގެންދިޔަ ކަމަށް ވެސް ފުލުހުން ބުނެއެވެ.
ހޮސްޕިޓަލާ ހަވާލާދީ ފުލުހުން ބުނީ، އެމީހާ ހޮސްޕިޓަލަށް ގެންދިޔަ އިރު ވެސް ވަނީ މަރުވެފައި ކަމަށެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
ގެސްޓް ހައުސްއެއްގެ ތެރެއިން މިއަދު މަރުވެފައި އޮތް މީހަކު ފެނިފައިވާ އިރު، މި މަހުގެ 7 ވަނަ ދުވަހު މާފަންނުގައި ހުރި ގއެއްގެ ތެރެއިން ވެސް މަރުވެފައި އޮތް މީހަކު ވަނީ ފެނިފައެވެ. އެމީހާގެ ޕޯސްޓްމޯޓަމް ހެދުމަށް ފުލުހުން ނިންމާފައި ވާ އިރު، އެ މަރާ ގުޅިގެން އިތުރު ތަފްސީލެއް ފުލުހުން ހާމައެއް ނުކުރެއެވެ.
