މަޝްއަރު ޓުއާސްއިން އުމްރާވެރިންތަކެއް އުމްރާއަށް ފޮނުވަން ކަމަށް ބުނެ ފޮނުވި ޗެކުތަކެއް ބައުންސްވެފައިވާ މައްސަލައިގައި އެ ކުންފުންޏާ ދެކޮޅަށް ދައުވާ ކުރުމަށް ޕްރޮސެކިއުޓާ ޖެނެރަލްގެ އޮފީހަށް ހުށަހަޅައިފިއެވެ.
މަޝްއަރު ގްރޫޕުގެ ޗެކުތަކެއް ބައުންސްވި ކަމަށް ބުނާ މި މައްސަލަ ފުލުހުންނަށް ރިޕޯޓްކޮށްފައި ވަނީ މިދިޔަ އޭޕްރީލް މަހުގެ 13 ވަނަ ދުވަހުއެވެ.
ފުލުހުން ބުނީ މި މައްސަލައިގެ ތަހުގީގު ނިންމުމަށްފަހު ދައުވާ ކުރުމަށްޓަކައި ޕްރޮސެކިއުޓާ ޖެނެރަލްގެ އޮފީހަށް ހުށަހަޅާފައި ވަނީ މިދިޔަ ޑިސެމްބަރު މަހުގެ 2 ވަނަ ދުވަހު ކަމަށެވެ.
އެ މައްސަލައަކީ މިދިޔަ 2023 ވަނަ އަހަރު އެ ގްރޫޕުން އުމްރާއަށް މީހުން ގެންދަން ފްލައިޓް ޗާޓަރުކުރި ދިވެހި ކުންފުންޏަށް ފައިސާ ދައްކަން ދިން ދެ ޗެކް ބައުންސްވި މައްސަލައެކެވެ. އެއީ 140،000 އަށް ވުރެ ގިނަ ޑޮލަރުގެ ޗެކަކާއި 90،000 ޑޮލަރުގެ ޗެކެކެވެ.
އެ މައްސަލައަށްފަހު އެ ގްރޫޕުން އުމްރާއަށް މީހުން ގެންދިއުމުގެ ހުއްދަ އިސްލާމިކް މިނިސްޓްރީއިން ބާތިލުކުރިއެވެ. އެހެންނަމަވެސް ނަން ބަދަލުކުރުމަށްފަހު މިދިޔަ އަހަރުގެ ރަމަޟާން މަހު އުމްރާއަށް މީހުން ގެންދިޔަ މައްސަލައެއް ފެންމަތިވެ، އެ މައްސަލަވެސް ވަނީ ފުލުހަށް ހުށަހަޅާފައެވެ.
