"ގާނޫނުއަސާސީގެ ދިފާއު" ގައި ކަމަށް ބުނެ މިމަހުގެ 31 ވަނަ ދުވަހު މަގުމައްޗަށް ނިކުންނަން އިދިކޮޅު މައި ޕާޓީ، އެމްޑީޕީގެ ގައުމީ މަޖިލީހުން ފާސްކޮށްފި އެވެ.
ރޭ ބޭއްވި އެ ޕާޓީގެ ގައުމީ މަަޖިލީހުން މިފަދައިން ނިންމާފައިވާއިރު ގާނޫނުއަސާސީގެ ދިފާއުގައި މަގުމައްޗަށް ނިކުންނަން ހުށަހެޅީ ރިޔާސަތުންނެވެ. ހުށަހެޅުމަށް އެއްވެސް މެންބަރަކު އިއުތިރާޒު ކޮށްފައި ނުވާއިރު މިދިޔަ މަހު 10 ވަނަ ދުވަހު އެމްޑީޕީން ވަނީ 'ގާނޫނުއަސާސީގެ ދިފާއު'ގައި ޖަލްސާއެއް ވެސް ބާއްވާފައެވެ.
ރަށްރަށުން މީހުން އައިސް ކުރިއަށް ގެންދިޔަ އެ ޖަލްސާގައި ވަނީ ގާނޫނު އަސާސީ އަށް ގެނެސްފައިވާ ބަދަލު ބާތިލް ކުރުމަށާއި، ރައްޔިތުންގެ ބާރުވެރިކަން ހިނގައިދާނެ އެއްވެސް ކަމެއް ނުކުރުމަށް މަޖިލީހަށާއި، ރައީސް މުއިއްޒަށް އަންގައި އަމުރުކޮށް ޕެޓިޝަނެއް ހުށަހަޅައި އެ ފާސް ކޮށްފައެވެ.
މީގެ އިތުރުން މުޅި ރާއްޖޭގެ އެކި ކަންކޮޅުތަކުގައި އިހުތިޖާޖުކުރުމުގެ ގޮތުން ސިޔާސީ ހަރަކާތްތައް ހިންގަން ފާސްކޮށްފައިވާއިރު އެމްޑިޕީން އިސްނަގައިގެން ސިޔާސީ އެހެން ޕާޓީތަކަށާއި މަދަނީ ޖަމިއްޔާތަކަށާއި ފަންނީ ދާއިރާތަކުގެ ބޭފުޅުންނަށް މިކަމުގައި އެކުގައި މަސައްކަތް ކުރަން ދައުވަތު ދިނުމަށްވެސް ވަނީ ނިންމާފައެވެ.
މި ހަރަކާތް އިދިކޮޅުން ފަށާފައި ވަނީ ގާނޫނުއަސީއަށް އެއް ދުވަސް ތެރޭ ބޮޑެތި ބަދަލުތަކެއް ސަރުކާރުގެ ސުޕަ މެޖޯރިޓީ އޮތް މަޖިލީހުން ގެނައުމާ ގުޅިގެންނެވެ.
ކުރީގެ ވެރިކަންތަކުގައި ވެސް ބޮޑެތި މުޒާހަރާތަކާއި އެއްވުންތައް އެމްޑީޕީން ބާއްވާފައިވާއިރު މިއީ ރައީސް ޑރ. މުހައްމަދު މުޢިއްޒު ވެރިކަމާ ހަވާލުވެވަޑައިގެންވި ފަހުން، އިދިކޮޅުން ބޮޑު ހަރަކާތެއްގެ ގޮތުގައި މަގުމައްޗަށް ނުކުންނަ ފުރަތަމަ ފަހަރުކަން ފާހަގަކޮށްލެވެއެވެ.
ޤާނޫނު އަސާސީގެ މައްޗަށް ފައިންއަރާތިބި ބަޔަކު އެޤާނޫނުއަސާސީ ދިފާޢުކުރާ ވާހަކަދައްކަން ލަދުގަންނަންޖެހޭނެ.