އިންޑިއާ އާއި ރާއްޖެ އާއި ދެ ގައުމުގެ ދެމެދުގައި ދިފާއީ އެއްބާރުލުން އިތުރަށް ހަރުދަނާ ކުރުމަށް މަޝްވަރާކުރައްވައިފިއެވެ.
ޑިފެންސް މިނިސްޓަރު މުހައްމަދު އައްސާން މައުމޫން މިހާރު އިންޑިއާއަށް ކުރައްވާ ދަތުރުފުޅުގައި މިއަދުވަނީ އިންޑިއާގެ ޑިފެންސް މިނިސްޓަރު ރާޖްނާތު ސިންގް އާއި ބައްދަލުކުރައްވާފައެވެ. އިންޑިއާގެ ނިއުދިއްލީގައި ބޭއްވި މި ބައްދަލުކުރެއްވުމުގައި ނޭޝަނަލް ޑިފެންސް ފޯސްގެ ގާބިލުކަން އިތުރުކުރުމަށް ތަމްރީނުތަކާއި، އެކްސަސައިޒްތައް އަދި ރާއްޖޭގެ ދިފާއީ ބާރުގެ ގާބިލުކަން އިތުރުކުރުމަށް ތަމްރީނުތައް ބޭއްވުމާއި ގުޅޭ ގޮތުން މަޝްވަރާވަނީ ކޮށްފައެވެ.
މިނިސްޓަރު އައްސާން އިންޑިއާއަށް ކުރައްވާ މި ދަތުރަކީ ޖެނުއަރީ 8 އިން 10 އަށް ތިން ދުވަހުގެ މުއްދަތަށް އިންޑިއާއަށް ކުރައްވާ ދަތުރެކެވެ. މިނިސްޓަރުގެ މި ދަތުރުގައި ގޯއާ އަދި މުމްބާއީއަށް ވެސް ވަޑައިގަންނަވާނެއެވެ.
އައްސާން އިންޑިއާއަށް ވަޑައިގަތުމުގެ ކުރިން ފޮރިން މިނިސްޓަރު ޑރ. އަބްދުﷲ ހަލީލް ވެސް ވަނީ އިންޑިއާއަށް ރަސްމީ ދަތުރެއް ކުރައްވައިފައެވެ.
