މާލޭގައި އަންހެނަކު ކަރުގައި ވަޅި ޖައްސާ ރަހީނުކުރި މައްސަލައިގައި ފުލުހުން ހައްޔަރުކޮށް، ދޫނިދޫ ޖަލުގައި ހުއްޓާ އަމިއްލައަށް އަހުމަދު އަތުހަރު މަރުވި މައްސަލައިގައި ހިމެނޭ ދެ ފުލުހެއްގެ މައްޗަށް ދައުވާ ކޮށްދިނުމަށް އެދި ހިއުމަން ރައިޓްސް ކޮމިޝަން (އެޗްއާރުސީއެމް) އިން ޕްރޮސެކިއުޓާ ޖެނެރަލް (ޕީޖީ) އޮފީހަށް ފޮނުވައިފި އެވެ.
އެޗްއާރްސީއެމް އިން މި މައްސަލައިގައި ދައުވާ ކޮށްދިނުމަށް އެދި ޕީޖީއަށް ފޮނުވާފައި ވަނީ އަތުހަރު ފުލުހުންގެ ބެލުމުގެ ދަށަށް ގެންދިޔަ ހިސާބުން އޭނާ މަރުވަންދެން ފުލުހުން އަމަލުކުރި ގޮތް ތަހުގީގު ކުރުމަށްފަހުއެވެ.
މިދިޔަ އޮގަސްޓް މަހުގެ 29 ވަނަ ދުވަހުގެ ރޭ ފުލުހުން އަތުހަރު ހައްޔަރު ކުރީ މާލޭގައި އަންހެނަކު ރަހީނު ކޮށްގެން ފިލަން މަސައްކަތް ކުރަނިކޮށެވެ. އަދި އޭނާ ހައްޔަރު ކުރުމުގެ ތެރޭގައި ބޮޑެތި އަނިޔާތަކެއް ލިބި އެ އަނިޔާތަކަށް ހޮސްޕިޓަލުގައި ވަނީ ފަރުވާވެސް ދީފައެވެ. ރަހީނުކުރި އެ މައްސަލައިގެ ޝަރީއަތް ނިމެންދެން ފުލުހުންގެ ބެލުމުގެ ދަށުގައި ދޫނިދޫގައި ހުއްޓާ އަތުހަރު މަރުވާން މަސައްކަތް ކުރީ ސެޕްޓެމްބަރު މަހުގެ 2 ވަނަ ދުވަހުއެވެ. އޭނާ ދަން ޖެހުނީ ލައިގެން ހުރި ސޯޓުގެ ނާޑުވާއެއް ބޭނުންކޮށްގެންނެވެ.
އެކަމާ ގުޅޭ އެންމެ ފަހުގެ މައުލޫމާތު ހިއްސާ ކުރަމުން އެޗްއާރްސީއެމް އިން ބުނީ، އެ މައްސަލައާއި ގުޅިގެން ދެ ފުލުހަކަށް ދައުވާކޮށްދިނުމަށް އެދި ޕީޖީ އޮފީހަށް ފޮނުވާފައިވާ ކަމަށެވެ. ނަމަވެސް އެކަމާ ގުޅޭ އިތުރު ތަފްސީލެއް އެޗްއާރްސީއެމްއިން ހާމަ ކޮށްފައި ނުވެއެވެ.
އަތުހަރު ދޫނިދޫ ޖަލުގައި ބަންދުކޮށްފައި ހުއްޓާ އޭނާ އަމިއްލައަށް ދަންޖެހިގެން މަރުވި މަންޒަރު ފެންނަ ސީސީޓީވީ ވީޑިއޯ ފުޓޭޖް ވެސް ފުލުހުން ވަނީ އާންމު ކޮށްފައެވެ. ސީސީޓީވީ ފުޓޭޖުން ފެންނަ ގޮތުގައި އަތުހަރު ވަނީ ސޯޓެއްގެ ނާޑުވާއެއް ބޭނުންކޮށްގެން އޭނާ ބަންދުކޮށްފައި ހުރި ގޮޅީގެ ކުޑަދޮރުގައި އައްސައިގެން ދަންޖެހެން މަސައްކަތް ކޮށްފައެވެ. އޭނާ ދަންޖެހުނުތާ 30 މިނެޓް ފަހުން އޮފިސަރުން ވަދެ އޭނާ ސަލަމާތް ކުރަން މަސައްކަތް ކޮށްފައި ވެއެވެ.
އޭނާގެ މަރުގެ މައްސަލަ އެޗްއާރްސީއެމްގެ އިތުރުން ނެޝަނަލް އިންޓަގިރިޓީ ކޮމިޝަނާއި ފުލުހުންގެ އިންޓާނަލް ތަހުގީގެއް ވެސް ހިންގާފައިވާއިރު މިހާތަނަށް އެއްވެސް މުއައްސަސާއެއްގެ ތަހުގީގާ ގުޅޭ ތަފްސީލު ހާމަކޮށްފައި ނުވެއެވެ.
