ޑާކްރެއިން އެންޓަޓެއިންމަންޓުން އުފެއްދި ވެބް ސީރީޒް "ރޯލީމޭ" މީޑިއާނެޓްގެ އެމްސްޓީވީގެ ވީޑިއޯ ކުލަބުގެ ޓްރެންޑިންގައި އެއްވަނަ އަށް ޖެހިލައިފިއެވެ.
މި ސީރީޒަކީ އަސަރުން ފުރިގެންވާ ކަންތައްތަކެއް ފެނިގެންދާނެ ސީރީޒެއްވެސްމެއެވެ. ޖުމްލަ 15 އެޕިސޯޑަކަށް ބަހާލައިގެން ގެނެސްދޭ މި ވެބް ސީރީޒްގެ ދެ އެޕިސޯޑެއް މިހާރު އާންމުންނާ ހަމައަށް ދައްކާލާފައިވާއިރު ސީރީޒްގެ ތިން ވަނަ އެޕިސޯޑު ދައްކާނީ އަންނަ ހޯމަ ދުވަހުއެވެ. މި ސީރީޒަކީ ޑާކް ރެއިނުން އޮކްޓޯބަރުގައި ގެނެސްދިން ހޮރޯ-ކޮމެޑީ "ބިބީ" ލިޔެ، ޑައިރެކްޓްކުރި ޝަހުދާ މަހުމޫދުގެ ސްކްރީންޕްލޭއަކަށް އަލީ ޝިފާއު (ޗިއްޕެ) ޑައިރެކްޓްކޮށްފައިވާ ސީރީޒެއްވެސް މެއެވެ. "ރޯލީމޭ" ގައި ހަރަކާތްތެރިވާނެ ތަރިންނަކީ ޝަރަފު އަބްދުﷲ، މަރިޔަމް މަޖުދާ (މަޖޫ)، މޫސާ އަލީފް، ނުޒުހަތު ޝުއައިބް (ނުޒޫ)، ރޯނު ހަސަން މަނިކު، އައިމިނަތު ޝުހާ، ޝީލާ ނަޖީބް އަދި މަރިޔަމް ހަލީމް އެވެ.
ސީރީޒްގައި މަޖޫ އާއި ޝަރަފް އަކީ އެންމެ ގާތް ދެ ރަހުމަތްތެރިންނެވެ. އަދި ޝުހާ އަކީ ޝަރަފްގެ ލޯބިވެރިޔާއެވެ. ނުޒޫ އާއި އަލީފް ކައިވެނިކޮށްގެން ސީރީޒްގައި އުޅޭއިރު ނުޒޫ އަކީ މަޖޫގެ ވެސް ވަރަށް ގާތް އެކުވެރިއެކެވެ. ޝުހާ އާއި ޝަރަފްގެ ލޯބީގެ ގުޅުމަށް ތޫފާނެެއް އަންނަނީ ޝަރަފްގެ އެންމެ ގާތް އެކުވެރިޔާ މަޖޫއަށް ދިމާވާ ހިތްދަތި ހާދިސާއެއްގެ ސަބަބުންނެވެ.
ސީރީޒް ބަލަންވީ ސަބަބުތައް:
ޝަހުދާގެ ސްކްރީންޕްލޭ މޮޅުކަމުން!
ޝަހުދާ އޭ ބުނުމުން ނޭނގޭ ދިވެއްސަކު މަދުވާނެއެވެ. އަޑުއެހުންތެރިންގެ މެދުގައި މަޝްހޫރު އާރްޖޭ ޝަހުދާގެ އެންމެ ފުރަތަމަ ސްކްރީންޕްލޭ އަކީ ޑާކްރެއިންގެ ފިލްމު "ބިބީ"އެވެ. މި ފިލްމަކީ އެ ކުންފުނިން ގެނެސްދިން ހޮރޯ ކޮމެޑީއެކެވެ. ފިލްމު ބެލުމަށްފަހު އެންމެންވެސް ދެއްކީ މިފަދަ ފިލްމަކަށް ދިވެހި ސިނަމާ ބޭނުންވެފައި އޮތް މިންވަރެވެ. ބެލުންތެރިން ހެއްވާލާ ބިރުގަންނަވާލީ އެންމެ މަތީ ފެންވަރުގައެވެ. ފިލްމުން ޝަހުދާގެ ކުޅަދާނަކަން ފެނި ގިނަ ބަޔަކު އިންތިޒާރުކުރީ އޭނާގެ ދެވަނަ ޕްރޮޖެކްޓަކަށެވެ. ރޯލީމޭ އަކީ ޝަހުދާގެ ސްކްރީންޕްލޭއެކެވެ. މި ވާހަކަ އަކީ އަސަރުން ފުރިގެންވާ ވާހަކައެކެވެ. ސީރީޒްގައި ކަންތައްވާގޮތް ބެލުމަށް ސީރީޒް ކޮންމެހެންވެސް ބަލަންވާނެއެވެ.
ޝަރަފްގެ އެކްޓިން ވަރުގަދަކަމުން!
ޝަރަފް އަކީ ދިވެހި ފިލްމު އިންޑަސްޓްރީއަށް މިހާރު އާ ނަމަކަށް ނުވާނެއެވެ. ކުޑަދުވަސްކޮޅެއްގެ ތެރޭގައި އާންމުންގެ އިތުބާރާއި ލޯބި ހޯދި މި އެކްޓަރަކީ މިއަދު ފިލްމު އިންޑަސްޓްރީގެ އެންމެ ފުންނާބު އުސް އެއް ތަރި ކަމާމެދު ޝައްކެތްނެތެވެ. ކޮންމެ ކަހަލަ ރޯލެއްވެސް ކުޅެލަން ކެރޭ ވާސަޓައިލް އެކްޓަރު ޝަރަފް ވަނީ މިހާތަނަށް ތަފާތު ރޯލުތަކުން ފެނިގެންގޮއްސައެވެ. ބިބީ އާއި ފުރޭތަ ފިލްމަށް ބަލާލި ނަމަވެސް އެކަން ހާމަވާނެއެވެ. އެ ދެ ފިލްމުގައި ޝަރަފް ކުޅުނީ އުޑާ ބިމާ ތަފާތު ދެ ރޯލެވެ. މި ފަހަރުގެ ސީރީޒްގައި ވެސް ޝަރަފް ފެނިގެންދާނީ ތަފާތު ގޮތަކަށެވެ. ބެލުންތެރިން މާޔޫސްކޮށްނުލާނެއެވެ.
މަޖޫގެ ހުނަރުވެރިކަމުން!
ޑާކްރެއިންގެ މޫނަކީ މަޖޫއޭ ބުންޏަސް ދޮގަކަށް ނުވާނެއެވެ. ބެލުންތެރިންގެ ލޯތްބާއި އިހްތިރާމް ހޯދާފައިވާ މަޖޫ އަކީ މޮޅު އެކްޓަރެކެވެ. މި ފަހަރުގެ ސީރީޒްގައި މަޖޫ ކުޅެނީ ޝަރަފްގެ އެންމެ ގާތް އެކުވެރިޔާގެ ރޯލެވެ. މަޖޫގެ ކެރެކްޓާގެ ހަޔާތަށް ދިމާވާ ކަންތައްގަނޑެއްގެ ސަބަބުން އޭނާގެ ދިރިއުޅުން ބަދަލުވެގެންދާނެއެވެ. އެ ހުރިހާ ސީންތަކެއްވެސް މަޖޫ ކުލެލީ ފުރިހަމަ އިތުބާރާއެކުގައެވެ. ހަމަގައިމުވެސް ބެލުންތެރިންނަށް މަޖޫގެ ކެރެކްޓާ ކަމުދާނެއެވެ.
