43 ބަނގުރާ ފުޅިއާއެކު 22 އަހަރުގެ ޒުވާނަކު ހައްޔަރުކޮށްފިއެވެ.
ފުލުހުން ބުނީ މި ޒުވާނާ ހައްޔަރުކޮށްފައިވަނީ ގަވައިދާ ހިލާފަށް ބަނގުރާ ގެންގުޅެ، ވިޔަފާރިކޮށް އެތަކެތި ބޭނުންކުރާކަމަށް ލިބުނު މައުލޫމާތަކާ ގުޅިގެން މާލޭގައި ހިންގި އޮޕަރޭޝަނެއްގެ ތެރެއިން ކަމަށެވެ.
ފުލުހުން ހައްޔަރުކޮށްފައިވަނީ ރ. މަޑުއްވަރި، އުފުލަންދޫގެ، އަލީ ހާޒިމް (22އ) އެވެ. ފުލުހުން ބުނީ މި އޮޕަރޭޝަނުގައި ހާޒިމް ދުއްވި ކާރު ހުއްޓުވާ ބަލާ ފާސްކުރިއިރު، އެކި ބްރޭންޑުތައް ހިމެނޭހެން ޖުމްލަ 43 ފުޅި ބަނގުރާ ފެނިފައިވާކަމަށާއި މިމައްސަލައާ ގުޅިގެން އޭނާ ދުއްވި ކާރު ޓޯކޮށްފައިވާކަމަށެވެ.
ފުލުހުން ބުނީ ހާޒިމްގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުންވަނީ 10 ދުވަހުގެ ބަންދުގެ މުއްދަތެއް ދީފައި ކަމަށެވެ. ފުލުހުން ގެންދަނީ މި މައްސަލަ އިތުރަށް ތަހުގީގުކުރަމުންނެވެ.
ފާހަގަކޮށްލެވޭ ގޮތުގައި އާ އަހަރާ ދިމާކޮށް ބަނގުރާ އަދި މަސްތުވާތަކެތި ބޭނުންކޮށް ވިއްކާ ވިޔަފާރި ކުރުން އިތުރުވެގެން ދާނެ ކަމަށް ބެލެވޭތީ، ޑްރަގް އެންފޯސްމެންޓާއި، ހުޅުމާލެ ޕޮލިސް، މެރިން ޕޮލިސް އަދި ކ. އަތޮޅު ޕޮލިސް ސްޓޭޝަނާ ގުޅިގެން ޑިސެމްބަރު 24 ވަނަ ދުވަހު ވަނީ ހާއްސަ އޮޕަރޭޝަނެއް ފަށާފައެވެ.
ފުލުހުން ވަނީ މި އޮޕަރޭޝަނުގައި ހުޅުމާލެ ފަޅުތެރެ ޕެޓްރޯލް ކުރާނެ ކަމަށާއި، ބަނގުރާ ވިއްކާ ކަމަށް ޝައްކުކުރެވޭ ކެފޭ ރެސްޓޯރެންޓުތައްވެސް ބަލާ ފާސްކޮށް ފިޔަވަޅު އަޅާނެ ކަމަށް ބުނެފައެވެ.
ފާހަގަކޮށްލެވޭ ގޮތުގައި މިދިޔަ އަހަރުގެ ނޮވެމްބަރު 17 ވަނަ ދުވަހުން ފެށިގެން މި އަހަރުގެ އޮކްޓޫބަރު 20 ވަނަ ދުވާހާ ހަމައަށް 328 މިލިއަން ރުފިޔާގެ މަސްތުވާތަކެއްޗާއި ރާ އަތުލައިގެންފައިވާ ކަމަށް ހޯމް މިނިސްޓަރު އަލީ އިހްސާން ވަނީ ވިދާޅުވެފައެވެ.
އެގޮތުން މި މުއްދަތުގައި 177 ކިލޯގްރާމްއަށްވުރެ ގިނަ މަސްތުވާތަކެއްޗާއި 8،300 އަށްވުރެ ގިނަ ބަނގުރާ ފުޅި އަދި ދަޅު އަތުލައިގެންފައިވާ ކަމަށެވެ. މިތަކެތީގެ މަގުމަތީގެ އަގު 328 މިލިއަންވުރެ މައްޗަށް އަރާކަމަށް ވަނީ ވިދާޅުވެފައެވެ.
