މ. ގްރީން ބިލްޑިންގު ގައި ރޯވެ ހިނގި އަލިފާނުގެ ބޮޑު ހާދިސާގެ ތަހުގީގަށް ގެނައި އިންޑިއާގެ ޓީމު ފުރާފައި ވާކަމަށް ފުލުހުން މިއަދު ބުނެފިއެވެ.
ސަރުކާރުގެ ތިން މިނިސްޓްރީއެއް ހިންގަމުން އައި އިމާރާތުގައި މިމަހުގެ 12 ވަނަ ދުވަހު ހިނގި އަލިފާނުގެ ހާދިސާގެ ތަހުގީގަށް ބޭރުގެ ޓީމެއްގެ އެހީތެރިކަން ހޯދާނެ ކަމަށް ޕޮލިސް ކޮމިޝަނާ އަލީ ޝުޖާއު މި މަހުގެ 14 ވަނަ ދުވަހު ވިދާޅުވެފައި ވާއިރު މި މަހުގެ 20 ވަނަ ދުވަހު މީޑިއާތަކާ ހިއްސާކުރި މެސެޖެއްގައި ފުލުހުންވަނީ އަލިފާނުގެ ހާދިސާއާ ގުޅިގެން ކުރިއަށްދާ ތަހުގީގުގައި، އިންޑިއާގެ ތަޖުރިބާކާރުންގެ ހާއްސަ ޓީމެއް ދިވެހި ފުލުހުންނާއެކު ހަރަކާތްތެރި ވަމުން އަންނަ ކަމަށެވެ.
ފުލުހުން ބުނީ އިންޑިއާގެ ތަޖުރިބާކާރުންގެ ޓީމުން ވަނީ ހާދިސާ ހިނގި ތަން ބަލައި، ތަހުގީގު ފުރިހަމަ ކުރުމަށް ބޭނުންވާ އެންމެހައި ކަންކަން ދިރާސާކޮށްފައިވާ ކަމަށެވެ. މީގެ އިތުރުން، ހާދިސާއާ ގުޅޭ ފޮޓޯ، ވީޑިއޯ އަދި ސީސީޓީވީ ފުޓޭޖްގެ އިތުރުން ހާދިސާއާ ގުޅުންހުރި މުހިންމު މައުލޫމާތުތައް ޓީމާ ހިއްސާކޮށްފައި ވާނެ ކަމަށް ފުލުހުން ވަނީ ބުނެފައެވެ.
މީގެ އިތުރުން ފުލުހުން ބުނީ މި ހާދިސާ އާއި ގުޅޭގޮތުން ފޯރުކޮށްދެވުނު މައުލޫމާތުތަކާ ތަކެތި ދިރާސާ ކުރުމަށް ފަހު، އެ ޓީމުގެ ހޯދުންތައް ދިވެހި ފުލުހުންގެ ހިދުމަތާ ހިއްސާ ކުރުމަށް ހަމަޖެހިފައި ވާކަމަށެވެ.
