މި ފެށޭ އާ އަހަރާ ދިމާކޮށް މަސްތުވާތަކެތީގެ ވިޔަފާރި އިތުރުވާނެކަމަށް ބެލެވޭތީ ހާއްސަ އޮޕަރޭޝަނެއް ފުލުހުން ފަށައިފިއެވެ.
ފުލުހުން ބުނީ އާ އަހަރާ ދިމާކޮށް ބަނގުރާ އަދި މަސްތުވާތަކެތި ބޭނުންކޮށް ވިއްކާ ވިޔަފާރި ކުރުން އިތުރުވެގެން ދާނެ ކަމަށް ބެލެވޭ ކަމަށާއި، އެހެންކަމުން ޑްރަގް އެންފޯސްމެންޓާއި، ހުޅުމާލެ ޕޮލިސް، މެރިން ޕޮލިސް އަދި ކ. އަތޮޅު ޕޮލިސް ސްޓޭޝަނާ ގުޅިގެން ޑިސެމްބަރު 24 ވަނަ ދުވަހު ހާއްސަ އޮޕަރޭޝަނެއް ފަށާފައިވާ ކަމަށެވެ.
ފުލުހުން ބުނީ މި އޮޕަރޭޝަނުގައި ހުޅުމާލެ ފަޅުތެރެ ޕެޓްރޯލް ކުރާނެ ކަމަށާއި، ބަނގުރާ ވިއްކާ ކަމަށް ޝައްކުކުރެވޭ ކެފޭ ރެސްޓޯރެންޓުތައްވެސް ބަލާ ފާސްކޮށް ފިޔަވަޅު އަޅާނެ ކަމަށެވެ.
ފާހަގަކޮށްލެވޭ ގޮތުގައި މިދިޔަ އަހަރުގެ ނޮވެމްބަރު 17 ވަނަ ދުވަހުން ފެށިގެން މި އަހަރުގެ އޮކްޓޫބަރު 20 ވަނަ ދުވާހާ ހަމައަށް 328 މިލިއަން ރުފިޔާގެ މަސްތުވާތަކެއްޗާއި ރާ އަތުލައިގެންފައިވާ ކަމަށް ހޯމް މިނިސްޓަރު އަލީ އިހްސާން ވަނީ ވިދާޅުވެފައެވެ.
އެގޮތުން މި މުއްދަތުގައި 177 ކިލޯގްރާމްއަށްވުރެ ގިނަ މަސްތުވާތަކެއްޗާއި 8،300 އަށްވުރެ ގިނަ ބަނގުރާ ފުޅި އަދި ދަޅު އަތުލައިގެންފައިވާ ކަމަށެވެ. މިތަކެތީގެ މަގުމަތީގެ އަގު 328 މިލިއަންވުރެ މައްޗަށް އަރާކަމަށް ވަނީ ވިދާޅުވެފައެވެ.
މި މުއްދަތުގެ ތެރޭގައި މަސްތުވާތަކެއްޗާ ގުޅޭ 335 މައްސަލަ ތަހުގީގުކޮށް ނިންމާ ޕްރޮސެކިއުޓާ ޖެނެރަލްގެ އޮފީހަށް ފޮނުވާފައިވާނެ ކަމަށާއި އަދި މާލެއާއި އަތޮޅު ތެރޭގައި 155 އޮޕަރޭޝަން ހިންގާފައި ވާއިރު، 12،000އަށްވުރެ ގިނަ ތަންތަން ބަލައިފާސްކޮށްފައިވާ ކަމަށް ވެސް އިހްސާން ވަނީ ވިދާޅުވެފައެވެ.
ހޯމް މިނިސްޓަރު އިހްސާނު ވިދާޅުވީ މި ކަމުން އަންގައިދެނީ ރާއްޖޭގެ މާހައުލުގައި މަސްތުވާތަކެތީގެ މައްސަލަ އޮތް މިންވަރު ކަމަށާއި އަމާޒަކީ މި ދައުރުގައި މިކަމަށް ދާއިމީ ހައްލެއް ހޯދުން ކަމަށެވެ.
