ފުވައްމުލަކު ސިޓީ ކައިރި ކަނޑުމަތިން އިއްޔެ ފެނުނު ސޯމާލިއާ މީހުން ރާއްޖެ އައި ގޮތް ތަހުގީގު ކުރަމުންދާ ކަމަށް ފުލުހުން ބުނެފިއެެވެ.
ފުވައްމުލައް ސިޓީއަށް އެމްއެންޑީއެފްގެ ބެލުމުގެ ދަށުން ގެނައި ސޯމާލިއާގެ އެ 3 ފިރިހެނުން މިހާރު ތިބީ ފުލުހުންގެ ބެލުމުގެ ދަށުގައި ކަމަށް ފުލުހުން ވަނީ ބުނެފައެވެ.
އެ މީހުން ރާއްޖޭގެ ސަރަހައްދަށް އައި ގޮތް ދެނެގަތުމަށް ތަހުގީގެއް ކުރަމުންދާކަން ފާހަގަކޮށް ފުލުހުން ބުނީ އެ މީހުންނާ ގުޅޭގޮތުން ގުޅުން ހުރި އިދާރާތަކާ މައުލޫމާތު ހިއްސާކޮށް، އަޅަންޖެހޭ ފިޔަވަޅުތައް އަޅަމުންދާ ކަމަށެވެ.
ފުވައްމުލަކު ސިޓީ ކައިރީ ކަނޑުމަތިން ސޯމާލިޔާ 3 މީހަކު ތިބި ޑިންގީއެއް ފެނި އެ ޑިންގީ އެމްއެންޑީއެފްގެ ބެލުމުގެ ދަށަށް ގެންގޮސްފައި ވަނީ އިއްޔެގެ ވަގުތެއްގައެވެ.
އެމްއެންޑީއެފް އިން ބުނެފައި ވަނީ އެ ޑިންގީ ފެނިފައި ވަނީ ފުވައްމުލަކު ސިޓީ ހުޅަނގު އުތުރުން 10 ވަރަކަށް މޭލު ބޭރުން ކަމަށެވެ. އަދި މައުލޫމާތު ލިބުމާއެކު އެމްއެންޑީއެފް ސަދަން އޭރިއާ ކޮމާންޑްގެ ކޯސްޓްގާޑުން އެ ސަރަހައްދަށް ގޮސް އެ ޑިންގީ އެމްއެންޑީއެފްގެ ބެލުމުގެ ދަށަށް ގެންގޮސްފައިވާ ކަމަށެވެ. އެ ޑިންގީއަކީ ސޯމާލިއާގެ މީހުން ބޭނުންކުރާ ވައްތަރުގެ "ސްކިފް" އެއް ކަމަށް އެމްއެންޑީއެފްއިން ވަނީ ބުނެފައެވެ.
މި އަހަރުގެ ޖޫން މަހުގެ ތެރޭގައި ވެސް ޑިންގީއާއެކު ރާއްޖޭގެ ފަޅުރަށެއް ކަމަށްވާ ނ. ވަވަތިއަށް ސޯމާލިޔާގެ ބަޔަކު ލައްގާފައި ވެއެވެ. އިރުމަތީ އެފްރިކާއަށް ނިސްބަތްވާ ސޯމާލިއާއަކީ ފަގީރުންގެ ނިސްބަތް ވަރަށް ގިނަ ގައުމެކެވެ. އަދި އެމީހުން އެއް ގައުމުން އަނެއް ގައުމަށް ހިޖުރަ ކުރުމަށް ޑިންގީ ފަދަ ތަކެތި ބޭނުން ކުރާކަން ފާހަގަ ކުރެވެއެވެ.
