ނުހައްގުން ގޯއްޗާއި ފްލެޓްތައް ދޫކުރި މައްސަލައިގައި ރަނގަޅު ތަހުގީގެއް މޯލްޑިވްސް ޕޮލިސް ސާވިސްއިން ހިންގައި، އެޗްޑީސީގެ މެނޭޖިން ޑިރެކްޓަރުގެ މަގާމަށް އައްޔަކުރި މައުރޫފް ޖަމީލް އެ ކުންފުނީގެ ކަންކަން އިސްލާހު ކުރައްވާނެ ކަމަށް އުންމީދު ކުރައްވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

މިއަދު ފޭސްބުކްގައި ކުރެއްވި ޕޯސްޓެއްގައި ނަޝީދު ވިދާޅުވީ، ނުހައްގުން ގޯތި ބަހާފައިވާ މައްސަލައާ ގުޅޭގޮތުން އަނެއްކާވެސް ދަންނަވާލަން އޮތީ މީގެ ކުުރީގައިވެސް ދެންނެވި ވާހަކަ ކަމަށެވެ. އެގޮތުން ކުރީގައި ވެސް ލިސްޓް ހަދާފައި ވަނީ ބޭއިންސާފުން އެތައް ބަޔަކަށް ގޯތި ލިބޭ ގޮތަށް ކަމަށެވެ. އަދި މިފަހަރު އަނެއްކާވެސް އެ ބޭއިންސާފަށް އިތުރު ބޮޅެއް އެކުލަވާލެވިފައިވާ ކަމަށް ނަޝީދު ވިދާޅުވިއެވެ.

އެހެން ނަމަވެސް މިފަހަރު މި މައްސަލަ ތަހުގީގު ކުރަން ފަށައި، އެޗްޑީސީގެ ވެރިން ބަދަލުކޮށްފައިވާކަން ފާހަގަކުރައްވާ ނަޝީދު ވިދާޅުވީ އުންމީދު ކުރަނީ މޯލްޑިވްސް ޕޮލިސް ސާވިސްއިން ރަނގަޅު ތަހުގީގެއް ހިންގާނެ ކަމަށް ކަމަށެވެ. އަދި މައުރޫފު ޖަމީލް އެންމެ ކަންކަން އިސްލާހު ކުރައްވާނެ ކަމަށް އުންމީދު ކުރައްވާ ކަމަށް ވެސް އެމަނިކުފާނު ވިދާޅުވިއެވެ.

'ބިންވެރިޔާ' ސްކީމާއި 'ގެދޮރުވެރިޔާ' ސްކީމުން ގޯއްޗާއި ފްލެޓް ދޫކުރުމުގައި ލިސްޓުގައި ނެތް ބަޔަކަށް ގޯތި ދޫކުރުމުގެ މައްސަލައާ ގުޅިގެން ފުލުހުން ހިންގާ ތަހްގީގުގެ ތެރެއިން، މި ކަމުގައި ބައިވެރިވާ ފަރާތްތައް ހޯދައި ފިޔަވަޅު އެޅިގެން ދާނެ ކަމަށް ރައީސް ޑރ. މުހައްމަދު މުއިއްޒު ވެސް ވަނީ ވިދާޅުވެފައެވެ.

މި މައްސަލަ ފެންމަތިވެފައި ވަނިކޮށް އެޗްޑީސީގެ މެނޭޖިން ޑިރެކްޓަރުގެ މަގާމުން އިބްރާހީމް ފަޒުލް ރަޝީދު ވަނީ އިސްތިއުފާދެއްވާފައެވެ. އަދި އެ މަގާމަށް ކުރީގެ ކޮންސްޓްރަކްޝަން މިނިސްޓަރު މައުރޫފް ޖަމީލް ވަނީ އައްޔަންކޮށްފައެވެ.

ހަބަރު އެޗްޑީސީ މުހައްމަދު ނަޝީދު ޑރ. މުހައްމަދު މުއިއްޒު