ގެދޮރުވެރިޔާ ފްލެޓަށް އަލުން ހުޅުވާލިކަމަށް ބުނެ ސްކޭމް މެސެޖުތަކެއް ދައުރުވާތީ ސަމާލުވުމަށް ފުލުހުން އިލްތިމާސްކޮށްފިއެވެ.
ފުލުހުން ބުނީ ހައުސިން މިނިސްޓްރީގެ ލިޔެކިއުންތަކެއް އެނދުމާ ގުޅިގެން ގެދޮރުވެރިޔާ ފްލެޓްތަކަށް އަލުން ފޯމު ލުމުގެ ފުރުސަތު ހުޅުވާލައިފިކަމަށް ބުނެ ދައުރުވަމުންދާ މެސެޖަކީ ސައްހަ މެސެޖެއް ނޫންކަމަށާއި މިފަދަ މެސެޖުތަކާ ލިންކުތަކަށް ހުރިހާ ފަރާތްތަކުންވެސް ސަމާލުވުމަށެވެ.
ހައުސިން މިނިސްޓްރީ ހިންގަމުން އައި އިމާރާތުގައި އަލިފާނުގެ ހާދިސާ މިމަހުގެ 12 ދުވަހު ހިނގާ އެ އިމާރާތް ވަނީ އެއްކޮށް އަނދައިގެން ގޮސްފައެވެ. މިކަމާ ގުޅިގެން ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ވަނީ މި ހާދިސާގައި ހައުސިން މަޝްރޫއުތަކާ ގުޅުންހުރި އެއްވެސް މައުލޫމާތެއް ނުގެއްލޭ ކަމަށާއި އެ މައުލޫމާތު ކްލައުޑްގައި ރައްކާކުރެވިފައިވާކަމަށް ވިދާޅުވެފައެވެ.
މި އަލިފާނުގެ ހާދިސާއާ ގުޅިގެން ގިނަ ބަޔަކު އަންނަނީ ބޯހިޔާވަހިކަމާ ގުޅޭ މަޝްރޫއުތައް ލަސްވާނެ ކަމުގެ ކަންބޮޑުވުމާއި، އަދި އެ މަޝްރޫއުތައް ކުރިއަށް ނުގެންދާނެ ކަމަށް ބުނެ މި ސަރުކާރަށް ފާޑުކިޔަމުންނެވެ.
އަދި މިއީ ބަޔަކު ގަސްތުގައި ކުރި ކަމެއްގެ ގޮތުގައި ވެސް ގިނަ ބަޔަކު އަންނަނީ ތުހުމަތު ކުރަމުންނެވެ. ރައްޔިތުންގެ އެތައް ހައްގެއް ނިގުޅައިގަތުމަށް ހިންގި ޖަރީމާއެއްގެ ގޮތުގައި ގިނަ ބަޔަކު މި ހާދިސާ ސިފަކުރެއެވެ.
