ސްޓޭޓް އިލެކްޓްރިކް ކޮންޕެނީ ލިމިޓެޑް (ސްޓެލްކޯ) އިން ކޮންމެ މަހަކުވެސް އެވްރެޖްކޮށް 8340 ގަސް އިންދަމުންދާ ކަމަށާއި މިހާތަނަށް 50،000 ގަސް އިންދިފައި ވާކަމަށް އެ ކުންފުނިން ބުނެފިއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާން ކުރައްވާފައިވާ 5 މިލިޔަން ގަސް އިންދުމުގެ ޕްރޮގުރާމަށް ވާސިލުވުމަށް ސްޓެލްކޯއިން ކުރަމުން އަންނަ މަސައްކަތް ހާމަކޮށް އެ ކުންފުނީގެ އެމްޑީ ހުސައިން ފަހުމީ ވިދާޅުވީ ރައީސްގެ ކޮންމެ ވައުދުތަކަކީވެސް މިހާރުގެ ޖީލުތަކާއި އަންނަން އޮތް ޖީލުތަކުގެ ފައިދާއަށް ވިސްނުންތެރިކަމާއެކު ތައްޔާރު ކޮށްފައިވާ ވައުދުތަކެއް ކަމަށެވެ. ބައިބައިވުން ދޫކޮށް ގައުމުގެ ކުރިއެރުމަށް މަސައްކަތްކުރުމަށް ގޮވާލަމުން ފަހުމީ ވަނީ މި ހަރަކާތްތަކަށް ސްޓެލްކޯގެ މުވައްޒަފުން ދެމުންދާ އެއްބާރުލުން ފާހަގަކޮށްފައެވެ.
މިއަހަރުގެ ޖޫން މަހުގެ 5 ވަނަ ދުވަހުން ފެށިގެން އިއްޔެއާ ހަމައަށް ސްޓެލްކޯއިން ޖުމްލަ 52،334 ގަސް އިންދާފައިވާކަމަށް އެ ކުންފުނިން ވަނީ ބުނެފައެވެ.
މި ދައުރުގެ ތެރޭގައި 5 މިލިޔަން ގަސް އިންދުމަށް ރައީސް ވައުދުވެވަޑައިގެންނެވީ މިދިޔަ އަހަރުގެ ޑިސެންބަރު މަހުގެ 1 ވަނަ ދުވަހު ކޮޕް-28 ސަމިޓުގައި ދެއްވި ތަގުރީރުގައެވެ.
