މީގެ ހަފްތާއެއް ކުރިން ހިނގި އަލިފާނުގެ ހާދިސާ ތަހްގީގުކުރަން އިންޑިއާގެ ތަޖުރިބާކާރުންގެ ޓީމެއް އަތުވެއްޖެއެވެ.
ފުލުހުންގެ ކޮމިޝަނަރު އަލީ ޝުޖާއު މީޑިއާތަކަށް ފޮނުއްވި މެސެޖެއްގައި މިއަދު ވިދާޅުވީ، ތިން މިނިސްޓްރީ އެއް ހިންގަމުން ދިޔަ ގްރީން ބިލްޑިން ކޮމްޕްލެކްސްގައި ހިނގި އަލިފާނުގެ ހާދިސާ ތަހްގީގުކުރުމަށް ފުލުހުންނާ އެކު އިންޑިއާގެ ތަޖުރިބާކާރު ޓީމަކުން ހަރަކާތްތެރިވަމުން ދާ ކަމަށެވެ.
އަލިފާނުގެ ހާދިސާ އާ ގުޅޭ މައުލޫމާތެއް ލިބިފައިވާ ނަމަ، ފުލުހުންގެ މޭޖާ ކްރައިމް އިންވެސްޓިގޭޝަން ޑިޕާޓްމަންޓާ ގުޅައިގެން (9911099) މައުލޫމާތު ހިއްސާކުރުމަށް ފުލުހުން އެދެއެވެ،
އަލިފާނުގެ ހާދިސާ އަށް ފަހު ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އާއި އެންވަޔަރަމަންޓް މިނިސްޓްރީގެ މަސައްކަތްތައް ވަނީ ދަރުބާރުގެއަށް ބަދަލުކޮށްފައެވެ. އަދި މާލެ ސިޓީ ކައުންސިލުން ދެމުންދާ ރަޖިސްޓްރޭޝަންގެ ހިދުމަތްތައް ވަނީ ކައުންސިލްގެ ހުޅުމާލެ އޮފީހަށް ބަދަލުކޮށްފައެވެ.
