އުމުރާ ނުގުޅޭ ވާހަކަ ދައްކާ ދަރިވަރަކު ގްރޫމްކުރި ޓީޗަރު ދޫކޮށްލައިފިއެވެ.
މީޑިއާތަކަށް ދިން މެސެޖުގައި ފުލުހުން ބުނީ މި ޓީޗަރުގެ ބަންދުގެ މުއްދަތު އިތުރުކުރުމަށް ކޯޓަށް ހާޒިރުކުރުމުން ޝަރުތުތަކަކާއެކު ދޫކޮށްލާފައިވާ ކަމަށާއި، މި މައްސަލައިގެ ތަހުގީގު ނިންމައި، ދައުވާ ކުރުމަށް ޕީޖީ އޮފީހަށް ފޮނުވާފައި ވަނީ މިދިޔަ ނޮވެމްބަރު މަހުގެ 25 ވަނަ ދުވަހު ކަމަށެވެ.
ފުލުހުން މީގެކުރިން ބުނެފައި ވަނީ ސައުތު ސެންޓްރަލް ޕޮލިސް (މ، ފ، ދ، ތ، ލ)ގައި ހިމެނޭ ރަށެއްގެ ފިރިހެން ޓީޗަރަކު ދަރިވަރުންގެ އުމުރާ ނުގުޅޭ ވާހަކަ ދައްކާ ގްރޫމްކުރި ކަމަށް ތުހުމަތު ކުރެވޭ މި މައްސަލަ ރިޕޯޓްކޮށްފައި ވަނީ އޮކްޓޫބަރު މަހުގެ 17 ވަނަ ދުވަހު ކަމަށެވެ.
މި މައްސަލައިގައި ތުހުމަތުކުރެވޭ 29 އަހަރުގެ ދިވެހި ފިރިހެން ޓީޗަރު ހައްޔަރުކޮށްފައި ވަނީ ކޯޓު އަމުރެއްގެ ދަށުން އޮކްޓޫބަރު 27 ވަނަ ދުވަހު ކަމަށް ފުލުހުން ވަނީ ބުނެފައެވެ.
އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 20 ދުވަހަށް ބަންދު ކުރުމަށް އަމުރުކޮށްފައިވެއެވެ. އަދި އެ މުއްދަތު ހަމަވުމުން ދެވަނަ ފަހަރަށް ކޯޓަށް ހާޒިރުކުރުމުން އޭނާ 30 ދުވަހަށް ބަންދުކުރުމަށް ކޯޓުން ވަނީ އަމުރުކޮށްފައެވެ.
ކުޑަކުދިންނާ ގުޅޭ މައްސަލަތަކީ ސީރިއަސް މައްސަލަތަކަށްވާތީ ކުއްޖާގެ އައިޑެންޓިޓީ ރައްކާތެރިކުރުމުގެ ގޮތުން ކުއްޖާގެ އަތޮޅާއި ރަށް ފުލުހުން ހާމަކޮށްފައެއް ނުވެއެވެ.
