ޕަބްލިކް ސާވިސް މީޑީއާ (ޕީއެސްއެމް) ގެ މެނޭޖިން ޑިރެކްޓަރުގެ މަގާމުގައި ހުންނެވި މުހައްމަދު ސައީދު އިސްތިއުފާ ދެއްވައިފިއެވެ.
މި ސަރުކާރު ވެރިކަމަށް އައި އިރު، ޕީއެސްއެމްގެ އެމްޑީއަކަށް އައްޔަން ކުރި ޒީނާ ޒާހިރު އެމަގާމުން އިސްތިއުފާ ދެއްވުމުން ސައީދު ޕީއެސްއެމްގެ އެމްޑީއަކަށް އައްޔަނުކޮށްފައި ވަނީ މިދިޔަ އޮގަސްޓު މަހުގެ ތެރޭގައެވެ. ސައިޑު އެ މަގާމުން އިސްތިއުފާ ދެއްވާފައިވާ އިރު، އޭނާ އިސްތިއްުފާ ދެއްވި ސަބަބު އަދި ހާމައެއް ނުކުރައްވައެވެ.
ސައީދު މަގާމުން އިސްތިއުފާ ދެއްވިއިރު، ޕީއެސްއެމްގެ ކޮންޓެންޓާ ގުޅޭ މައްސަލަތައް އަންނަނީ ފެންނަމުންނެވެ. އެގޮތުން ޕީއެސްއެމުން ވަގުތުން ގެނެސްދިން އިވެންޓެއްގައި ޤުރުއާނުން ބައެއް އުނިވީ ކަމަށް ބުނެ މިދިޔަ ބުރާސްފަތި ދުވަހު ރައްޔިތުންގެ މަޖިލީހަށް ކުއްލި މައްސަލައެއް ވަނީ ހުށަހަޅައިފައެވެ. މި މައްސަލައާ ގުޅިގެން ސައީދު ވިދާޅުވެފައި ވަނީ ޤުރުއާނުން ބައެއް އުނިވީ ޓެކްނިކަލް މައްސަލައެއްގެ ސަބަބުން ކަމަށާއި އެ ކަމުގައި އިހުމާލުވި މުވައްޒަފުން ވަޒީފާގެ މަސްއޫލިއްޔަތުތަކުން އެކަހެރިކޮށްފައިވާ ކަމަށެވެ.
އޭގެ ފަހުން، ޕީއެސްއެމްއިން ގެނެސްދިން އިނގިރޭސި ހަބަރުގެ ސެގްމަންޓެއްގައި ބޭއަދަބީ މަންޒަރެއް ދެއްކި މައްސަލައެއް ވެސް ވަނީ ފެންމަތިވެފައެވެ. މިަކމާ ގުޅިގެން ޕީއެސްއެމްގެ ދެ މުވައްޒަފަކު ސަސްޕެންޑު ކުރިއެވެ.
