މި ސަރުކާރަށް ފާޑުކިޔައި އެކި ޕޯޑިއަމްތަކުގައި ވާހަކަ ދައްކަވަމުން ގެންދަވާ ރ. ދުވާފަރު ކައުންސިލްގެ އެމްޑީޕީގެ މެންބަރު މަރިޔަމް ޔަޝްފާ ފުލުހުންގެ އިދާރާއަށް ހާޒިރުވާން އަންގައިފިއެވެ.
'ދަ ޕްރެސް' އަށް މައުލޫމާތު ދެއްވަން ޔަޝްފާ ވިދާޅުވީ، ފުލުހަށް ހާޒިރު ވުމަށް އަންގައި އޭނާއަށް އެންމެ ފުރަތަމަ ގުޅާފައި ވަނީ ދުވާފަރު ޕޮލިސް ސްޓޭޝަނުން ކަމަށެވެ. ނަމަވެސް އޭނާ އޭރު އިންނެވީ މާލޭގައި ކަމަށާއި ފުލުހަށް ހާޒިރު ވުމަށް ޗިޓެއް ވެސް ލިބިވަޑައިނުގަންނަވާ ކަމަށެވެ.
އޭގެ ފަހުން ފުލުހުންގެ މައި އިދާރާއަށް މާދަމާ 10:30 އަށް ހާޒިރު ވުމަށް އަންގައި ފުލުހުން ވަނީ ޔަޝްފާ އަށް ޗިޓެއް ފޮނުވާފައެވެ. އެއީ ނޮވެމްބަރު މަހުގެ 11 ވަނަ ދުވަހު އެމްޑީޕީ ޖަގަހައިގައި ދެއްކި ވާހަކައަަކާ ގުޅިގެން ކަމަށް ފުލުހުން އެ ޗިޓުގައި ބުނެފައި ވާ ކަމަށް ވެސް ޔަޝްފާ ވިދާޅުވިއެވެ.
މީގެ އެއް މަސް ދުވަސް ކުރީގައި ދެއްކެވި ވާހަކައަކާ ގުޅިގެން މައްސަލަ ބަލަން ފުލުހަށް ހާޒިރު ކުރާ ކަން ފާހަގަ ކުރައްވައި ޔަޝްފާ ކަންބޮޑުވުން ހިއްސާކުރެއްވިއެވެ. އަދި ވާ ގޮތެއް އިނގޭނީ ފުލުހަށް ވަޑައިގަތީމައި ކަމަށް ވެސް އޭނާ ވިދާޅުވިއެވެ.
ނޮވެންބަރު 11 ގައި އެމްޑީޕީގެ ދަނޑިކޮށި ޖަގަހައިގައި ބޭއްވި ބައްދަލުވުމަކީ ހުރިހާ ކައުންސިލަކުން އެއްވެ ބާއްވާފައިވާ ޖަލްސާއެކެވެ. އެ ޖަލްސާގާއި ޔަޝްފާ މި ސަރުކާރަށް ފާޑުވިދާޅުވެ ވާހަކަ ދައްކަވަމުން ވަނީ ބަންޖަކާއި ރައިވަރެއް ވިދާޅުވެފައެވެ. އެރޭ ވިދާޅުވެފައިވާ ބަންޖެއްގައި "ހަވަރަށް ދޭން" ގޮވާލައްވާފައި ވެސް ވެއެވެ.
ހަމައެގޮތަށް އެމްޑީޕީން އަލިމަސް ކާނިވަލުގައި މި މަހުގެ 10 ވަނަ ދުވަހު ބޭއްވި ޖަލްސާގައި ވެސް އޭނާ ވަނީ ސަރުކާރަށް ފާޑުވިދާޅުވެ ވާހަކަ ދައްކަވާފައެވެ. އެ ޖަލްސާގައި ވެސް އޭނާ ވަނީ ރައިވަރަކާއި ޅެމެއް ކިޔުއްވާފައެވެ.
އޭގެ ތެރެއިން "ތިއީ ބަހުލޫލެކޭ، ތިއީ ޝައިތޯނެކޭ، މަށާ ކައިރި ނުވާށޭ" މި ޅެން ޔަޝްފާ ވިދާޅުވި އިރު، މި ޅެން އަމާޒު ކުރައްވާފައި ވަނީ މިހާރުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއަށް ކަން އޭނާ އެރޭ ދެއްކެވި ވާހަކަތަކުން ދޭހަވެއެވެ. އެއީ އެ ބައިތާއެކު މި ސަރުކާރުން ދޮގު ހަދަމުން އަންނަ ކަމަށް ބުނެ ތަކުރާރުކޮށް ވާހަކަ ދައްކަވައި "ތިއީ ދޮގުވެރިއެކޭ" ވެސް ބުނެ މަޖާޒީ ބަސްތައް އަމާޒު ކޮށްފައި ވެއެވެ.
