މި މަހުގެ 14 ވަނަ ދުވަހު މާލޭގައި ހިނގި ތިން މާރާމާރީއެއްގެ މައްސަލަ ފުލުހުން ބަލަން ފަށައިފިއެވެ.
މިގޮތުން ފުލުހުން ބުނީ މި މަހުގެ 14 ވަނަ ދުވަހު، ހެލްމެޓް އަޅައިގެން ސައިކަލެއްގައި އައި ބަޔަކު މާލޭގެ ކެފޭއެއްގެ ތެރެއަށް ވަދެ މާރާމާރީ ހިންގި މައްސަލައެއް ބަލަން ފަށާފައިވާކަމަށެވެ. މުނިޔާމަގުގައި ހުންނަ ދިރިޕަބްލިކް ކެފޭ ތެރެއަށް ވަދެ މާރާމީރީ ހިންގި މައްސަލަ ފުލުހުން ތަހުގީގުކުރަމުން އަންނައިރު ހަމަ އެރޭ މާލޭގެ އެހެން ސަރަހައްދެއްގައިވެސް ވަނީ މާރާމާރީއެއް ހިންގާފައެވެ.
އެ ގޮތުން ފުލުހުން ބުނީ ޝަހީދުކުޑަނެވި ތުއްތުމަނިކު ހިނގުންގައި ހުންނަ ކިންޒާ ކެފޭ ކުރިމަތީ ތޫނުހަތިޔާރު ބޭނުންކޮށްގެން މާރާމާރީ ހިންގާފައިވާ މައްސަލައެއްވެސް ހުށަހަޅާފައިވާ ކަމަށެވެ. މީގެ އިތުރުން ހަމަ އެރޭ ފިލިގަސްމަގު ނޫރު މިސްކިތް ކައިރީގައިވެސް މާރާމާރީއެއް ހިންގައިގެން އުޅޭ މައްސަލަ ރިޕޯޓްކޮށްފައިވާކަމަށް ފުލުހުން ވަނީ ބުނެފައެވެ.
މި ތިން މައްސަލައާއި ގުޅިގެންވެސް އަދި މިހާތަނަށް ބަޔަކު ހައްޔަރުކޮށްފައިވާކަން ފުލުހުން ހާމަކޮށްފައި ނުވާއިރު، ފުލުހުން ވަނީ ޑިސެމްބަރު 12 ވަނަ ދުވަހު ލެޓްސްގޯ ކެފޭއަށް ބަޔަކު ވަދެ ގެއްލުންދިން މައްސަލައެއް ބަލަމުން އަންނަކަމަށްވެސް ބުނެފައެވެ.
އިތުރަށް ފުލުހުން ބުނީ ތަހުގީގު ކުރިއަށް ދިޔަ މިންވަރަކުން އިތުރު ތަފްސީލް ހާމަކުރާނެކަމަށެވެ.
