ދިވެހި ފުލުހުންގެ ހިދުމަތުގައި މަސައްކަތް ކުރަމުންދިޔަ ސާޖަންޓެއް ކުއްލިގޮތަކަށް ނިޔާވެއްޖެއެވެ.
ނިޔާވެފައިވަނީ، ފުލުހެއްގެ ގޮތުގައި 18 އަހަރު ހިދުމަތްކޮށްފައިވާ ތ. ގުރައިދޫ، ތެމާ، ސާޖަންޓް ފާތިމަތު ރިފާއެވެ.
އޭނާ ނިޔާވުމާ ގުޅިގެން ފުލުހުން ނެރުނު ތައުޒިޔާގެ މެސެޖްގައި ރިފާގެ އާއިލާ އަށް ޕޮލިސް ކޮމިޝަނަރު އަލީ ޝުޖާއު އާއި ފުލުހުންގެ ހުރިހާ މުވައްޒަފުންގެ ނަމުގައި ވަނީ ތައުޒިޔާ ފޮނުވައިފައެވެ. " މަރްހޫމާގެ ފުރާނައަށް ސުވަރުގޭގެ ދާއިމީ ނިއުމަތް މިންވަރު ކުރައްވައި ބަރުޒަހުގެ އާލަމް ތަނަވަސް ކޮށްދެއްވުން އެދި މާތް ﷲ ގެ ހަޒްރަތަށް ދުއާ ދަންނަވަން. އާމީން" ފުލުހުންގެ ތަރުޖަމާނު އަހުމަދު ޝިފާން އެކްސްގައި ކުރެއްވި ޕޯސްޓުގައިވެއެވެ.
ރިފާ ނިޔާވުމާ ގުޅިގެން ނައިބު ރައީސް ހުސައިން މުހައްމަދު ލަތީފް އެކްސްގައި ކުރެއްވި ޕޯސްޓެއްގައި ވަނީ، ރިފާގެ މަރުގެ ހަބަރު އެއްސެވީ ކުއްލި ހައިރާންކަމާއި ފުން ހިތާމައާއެކު ކަމަށެވެ. އަދި ރިފާގެ އާއިލާއަށް ކެތްތެރިކަން ދެއްވުމަށް އެދި ނައިބު ރައީސް ވަނީ ދުއާ ދަންނަވާފައެވެ.
ރިފާގެ މަރާއި ގުޅޭ އިތުރު އެއްވެސް ތަފްސީލެއް ފުލުހުން ހާމަކޮށްފައެއް ނުވެއެވެ.
