ޗައިނާ އަށް ކަނޑައެޅި އާ ސަފީރު ޑރ. ފަޒީލް ނަޖީބު، އެ ގައުމުގެ ރައީސް ޝީ ޖިންޕިން އަށް ސަފީރުކަމުގެ ފަތްކޮޅު އަރުވައިފިއެވެ.
ފަޒީލް ޝީ އަށް ސަފީރުކަމުގެ ފަތްކޮޅު އެރުވީ ޗައިނާގެ ވެރިރަށް ބެއިޖިންގައި ހުންނަ 'ގްރޭޓް ހޯލް އޮފް ދަ ޕީޕަލް'ގައި މިއަދު އޮތް ރަސްމިއްޔާތެއްގައެވެ. 'ގްރޭޓް ހޯލް އޮފް ދަ ޕީޕަލް' އަކީ ޗައިނާގެ ސަރުކާރުން އެކި ހަފްލާތަކާއި ރަސްމިއްޔާތުތައް ބޭއްވުމަށް ބޭނުންކުރާ ތަނެކެވެ.
ފޮރިން މިނިސްޓްރީން ބުނީ، ފަޒީލަށް ޝީ މަރުހަބާ ވިދާޅުވި ކަމަށާއި، ރާއްޖެ އާއި ޗައިނާގެ ގުޅުން ވަރުގަދަކުރުމަށް އެމަނިކުފާނުގެ ފުރިހަމަ އެއްބާރުލުން ލިބިވަޑައިގަންނަވާނެ ކަމުގެ ޔަގީންކަން ޝީ ދެއްވި ކަމަށެވެ.
މީގެ ކުރިން މަރުކަޒީ އެމްއެމްއޭގެ ގަވަރުނަރުކަމާއި ފޮރިން މިނިސްޓްރީގެ ސްޓޭޓް މިނިސްޓަރުގެ މަގާމު ވެސް ފުރުއްވި ފަޒީލަކީ ރާއްޖެއިން ޗައިނާ އަށް ކަނޑައެޅި ފަސްވަނަ ސަފީރެވެ.
ރާއްޖެ އާއި ޗައިނާއިން ސިޔާސީ ގުޅުން ގާއިމްކުރީ އޮކްޓޯބަރު 14، 1972 ގައެވެ.
