ރަސްމީ ދަތުރެއްގައި މި ވަގުތު ރާއްޖެއިން ބޭރުގައި ހުންނެވި ހައުސިން މިނިސްޓަރު ޑރ. އަލީ ހައިދަރު، އެ މިނިސްޓްރީ ހުންނަ އިމާރާތުގައި ހިނގި އަލިފާނުގެ ހާދިސާއާ ގުޅިގެން އެ ދަތުރު ކުރުކޮށްލެއްވުމަށް ފަހު އެނބުރި ވަޑައިގަންނަވަން ނިންމަވައިފިއެވެ.
މިނިސްޓަރު ހައިދަރު މިވަގުތު ހުންނެވީ އދ. އިން ބާއްވާ ސެޝަން އޮފް ދަ ކޮމިޓީ އޮން ސްޓެޓިސްޓިކްސްގެ ނުވަ ވަނަ ބައްދަލުވުމުގައި ބައިވެރިވެވަޑައިގަތުމަށް ތައިލޭންޑުގައެވެ.
ހައުސިން މިނިސްޓްރީގައި ރޯވި އަލިފާންގަނޑުގެ ބޮޑުބައި ނިއްވާލެވިފައިވާއިރު އެމްއެންޑީއެފް އިން ބުނީ މި އިމާރާތް ބޭނުން ނުކުރެވޭ ވަަރަށް އަނދާފައިވާކަމަށެވެ.
މީގެ އިތުރުން އެމްއެންޑީއެފް އިން ބުނީ އެ އިމާރާތަކީ ސްޓީލް ސްޓްރަކްޗާއަކަށްވާތީ އިމާރާތް ވަރަށް ބަލިކަށިކަމަށެވެ.
އަލިފާން ނިއްވުމުގެ މަސައްކަތުގައި އެމްއެންޑީއެފްގެ އިތުރުން އެމްއޭސީއެލްއާއި އެމްޕީއެލް އަދި އެކިއެކި ވުޒާރާގެ މުވައްޒަފުންނާއި، އެންޑީއެމްއޭ، އަދި ރެޑް ކްރެސެންޓުން އަންނަނީ ހަރަކާތްތެރިވަމުންނެވެ.
