އޮޑިފަހަރުގައި މަސް ފިނިކޮށް ތާޒާކޮށް ބަހައްޓައިދޭ ނިޒާމް (އާރްއެސްޑަބްލިޔު) ނުވަތަ ލޮނުފެނުން ފިނިކުރާ ނިޒާމް (ރެފްރިޖެރެޓެޑް ސީވޯޓާ) ރާއްޖެއަށް އަލަށް ތައާރަފްކޮށްފިއެވެ.
އެމްޓީސީސީއިން ބުނީ މިކަމަށްޓަކައި މަސްވެރިންނަށް ބޭނުންވާ ފައިސާ ފޯރުކޮށްދިނުމުގެ އިންތިޒާމު ހަމަޖެއްސުމަށް ސަރުކާރުން ނިންމާފައި ވަނީ މަސްވެރިކަމާބެހޭ ވުޒާރާގެ ގްރާންޓް ޕްރޮގްރާމްގެ ދަށުން ކަމަށެވެ. އަދި ޔަންމާއިން އުފައްދާފައިވާ އާރްއެސްޑަބްލިޔު ނިޒާމަކީ އިންޖީނަކާއި ޖަނަރޭޓަރެއްގެ އިތުރުން ލޮނުފެނުން ފިނިކުރާ އާ އިޖާދީ ޓެކްނޮލޮޖީގެ އެހީގައި މަސްފިނިކޮށް ބަހައްޓަދޭ ތަފާތު ނިޒާމެއް ކަމަށް އެ ކުންފުނިން ބުނެއެވެ.
މި ނިޒާމް ފަރުވާކޮށްފައި ވަނީ ދެމެހެއްޓެނިވި އިތުބާރުހުރި ފެންވަރު ރަނގަޅު ހައްލެއް މަސްވެރިންނަށް ހޯދައިދިނުމުގެ ގޮތުން ކަމަށާއި މި ނިޒާމްގެ ސަބަބުން މަސްވެރިން ބާނާ މަސް ތާޒާކޮށް އޭގެ ފެންވަރު ދަށް ނުވާނެހެން ބެހެއްޓުމަށް މަގުފަހިކޮށްދޭނެ ކަމަށް އެމްޓީސީސީއިން ވަނީ ބުނެފައެވެ. އަދި މިކަމުގެ ސަބަބުން މަސްވެިންނަށް މަހުގެ ހަމައަގު ލިބި އާމްދަނީ އިތުރުވެގެންދާނެކަން އެމްޓީސީސީއިން ވަނީ ފާހަގަކޮށްފައެވެ.
އެމްޓީސީސީއިން ބުނީ އާރްއެސްޑަބްލިޔު ސިސްޓަމްއިން މަސް ފިނިކޮށް ބެހެއްޓުމަށްޓަކައި ބޭނުން ކުރާ ޓެކްނޮލޮޖީއިން ވަރަށް ހައި ޕްރެޝާގައި ކާބަންޑައި އޮކްސައިޑް ދޫކޮށްދިނުމުގެ ސަބަބުން މި ނިޒާމުން ވަރަށް އަވަހަށް ލޮނުފެން ފިނިކޮށްދީ ފިނި ހިފައްޓައިދޭ ކަމަށެވެ. އަދި އާރްއެސްޑަބްލިޔު ނިޒާމަކީ ކުޑަ ހަކަތައެއް ބޭނުންކޮށްގެން މަސައްކަތްކުރެވޭގޮތަށް ފަރުމާކޮށްފައިވާ ނިޒާމެއްކަމަށްވުމާއެކު ހިންގުމުގެ ހަރަދު ވަރަށް ބޮޑަށް ކުޑަކޮށްދޭނެ ކަމަށް އެމްޓީސީސީއިން ވަނީ ބުނެފަވެ.
މީގެއިތުރުން މި ނިޒާމަކީ ޖާގަ ކުޑަ ދޯނިތަކުގައި ވެސް ބޭނުން ކުރުމަށް އެކަށީގެންވާ ގޮތަށް ފަރުވާކުރެވިފައިވާ ނިޒާމެއްކަން އެމްޓީސީސީއިން ފާހަގަކުރެއެވެ.
ފަސޭހައިން ކޮންޓްރޯލް ކުރެވޭ ގޮތަށް ފަރުމާކޮށްފައިވާ އާރްއެސްޑަބްލިޔު ނިޒާމުގައި ފިނިކުރުމަށް ބޭނުންކުރާ އާރްސެވަންފޯފޯ ރެފްރިޖަރަންޓްއަކީ ސީއޯޓޫ ރެފްރިޖަރަންޓްގެ ގޮތުގައި ބޭނުންކުރާ ރެފްރިޖަރަންޓްގެ ތެރެއިން ތިމާވެށްޓާ އެންމެ ރަށްޓެހި އެއް ރެފްރިޖެރަންޓް ކަމަށް އެމްޓީސީސީއިން ބުނެއެވެ. އެހެންކަމުން މި ނިޒާމުގެ ސަބަބުން މަސް ފިނިކޮށް ބެހެއްޓުމުގެ ގާބިލްކަމާއި ފެންވަރު އިތުރުވެގެންދާއިރު، މިފަދަ ނިޒާމެއް ބޭނުންކުރުމުގެ ސަބަބުން ނާޒުކު ތިމާވެއްޓަށް ކުރާ އަސަރު ކުޑަކުރެވިގެން ދިޔުމަކީ ވެސް ވަރަށް ބޮޑު ކާމިޔާބީއެއްކަން އެމްޓީސީސީއިން ވަނީ ފާހަގަކޮށްފައެވެ.
މި ނިޒާމް ރާއްޖެއަށް ތައާރަފުކުރެވުނީ ދިވެހި ސަރުކާރުގެ އިސްނެންގެވުމުގެ މަތިން، އެމްޓީސީސީއާއި ޔަންމާގެ ބައިވެރިވުމާއެކުއެވެ.
