ފަތުރުވެރިކަމުގެ ދާއިރާއިން ލިބުނު ޓެކްސް އާމްދަނީއަށް އައި ހެޔޮ ބަދަލާއެކު، މިއަހަރުގެ މިހާތަނަށް ދައުލަތަށް ލިބުނު ޖުމްލަ އާމްދަނީ ބޮޑުތަނުން އިތުރުވެއްޖެއެވެ. މިއާއެކު، ލާމަރުކަޒީ ނިޒާމު ހަރުދަނާކުރުމަށް ކައުންސިލްތަކަށް ދޫކުރާ ހިލޭ އެހީއާއި، ބިން ހިއްކުން ފަދަ އުމްރާނީ ތަރައްގީގެ މުހިންމު މަޝްރޫއުތަކަށް ކުރި ހޭދަ ވެސް ވަނީ ފާހަގަކޮށްލެވޭ މިންވަރަކަށް މައްޗަށް ގޮސްފައެވެ.
މިނިސްޓްރީ އޮފް ފައިނޭންސް އެންޑް ޕަބްލިކް އެންޓަޕްރައިޒަސް އިން އާންމުކޮށްފައިވާ "ވީކްލީ ފިސްކަލް ޑިވެލޮޕްމަންޓްސް" ރިޕޯޓުގައިވާ ގޮތުން، 22 އޮކްޓޫބަރު 2026 ގެ ނިޔަލަށް ދައުލަތަށް ލިބުނު ޖުމްލަ އާމްދަނީ އާއި ހިލޭ އެހީގެ މިންވަރު ވަނީ 33.36 ބިލިއަން ރުފިޔާއަށް އަރާފައެވެ. މިއީ 2025 ވަނަ އަހަރުގެ އެ މުއްދަތުގައި ލިބުނު 31.60 ބިލިއަން ރުފިޔާއާ އަޅާބަލާއިރު 5.6 ޕަސެންޓްގެ ކުރިއެރުމެކެވެ.
އާމްދަނީ އިތުރުވުމުގެ މައިގަނޑު ސިއްރަކީ ޓެކްސްގެ ގޮތުގައި ލިބުނު ފައިސާ 9.8 ޕަސެންޓް މައްޗަށް ދިއުމެވެ. އެގޮތުން ވޭތުވެދިޔަ އަހަރުގެ މި މުއްދަތުގައި ޓެކްސް އާމްދަނީގެ ގޮތުގައި 23.44 ބިލިއަން ރުފިޔާ ލިބިފައިވާއިރު، މިއަހަރު މި އަދަދު ވަނީ 25.73 ބިލިއަން ރުފިޔާއަށް އުފުލިފައެވެ.
މީގެ ތެރެއިން އެންމެ ބޮޑު ހިއްސާއެއް އަދާކުރި ފަތުރުވެރިކަމުގެ ދާއިރާގެ ޓީޖީއެސްޓީ އާމްދަނީ 5.7 ޕަސެންޓް އިތުރުވެ، 8.87 ބިލިއަން ރުފިޔާއަށް ވަނީ އަރާފައެވެ. އަދި ގްރީން ޓެކްސްގެ ގޮތުގައި 1.78 ބިލިއަން ރުފިޔާ ލިބިފައިވާއިރު، ވިޔަފާރި އާއި މުދަލުން ނަގާ ޓެކްސް ވަނީ 21.8 ޕަސެންޓްގެ ބޮޑު ކުރިއެރުމަކާއެކު 5.97 ބިލިއަން ރުފިޔާއަށް މައްޗަށް ޖެހިލާފައެވެ. މީގެ އިތުރުން އިމްޕޯޓް ޑިއުޓީން 2.82 ބިލިއަން ރުފިޔާ އަދި ޖެނެރަލް ޖީއެސްޓީގެ ގޮތުގައި 4.46 ބިލިއަން ރުފިޔާ ވަނީ ދައުލަތަށް ލިބިފައެވެ. ރިސޯޓު ކުއްޔާއި އެއާޕޯޓް ފީ ފަދަ ޓެކްސް ނޫން ބައެއް އާމްދަނީތައް އިތުރުވި ނަމަވެސް، ޖުމްލަގޮތެއްގައި ޓެކްސް ނޫން އާމްދަނީ ވަނީ 9.5 ޕަސެންޓް ދަށަށް ގޮސްފައެވެ.
އާމްދަނީއަށް ކުރިއެރުން ލިބުނުއިރު، ދައުލަތުގެ ޖުމްލަ ހަރަދުތައް ވެސް ވަނީ 17.0 ޕަސެންޓް އިތުރުވެ، 37.21 ބިލިއަން ރުފިޔާއަށް އަރާފައެވެ. މީގެ ތެރޭގައި ހިންގުމުގެ ހަރަދުގެ ގޮތުގައި ހިމެނޭ 32.00 ބިލިއަން ރުފިޔާގެ އިތުރުން، ތަރައްގީގެ މަޝްރޫއުތަކަށް ކުރި ކެޕިޓަލް ހޭދަ ވަނީ 5.21 ބިލިއަން ރުފިޔާއަށް އުފުލިފައެވެ.
މި މުއްދަތުގައި ކައުންސިލްތަކުގެ ހިންގުން ހަރުދަނާކުރުމަށް ދޫކުރި ގްރާންޓް 15.9 ޕަސެންޓް އިތުރުވެ، 2.08 ބިލިއަން ރުފިޔާ ވަނީ ދޫކޮށްފައެވެ. ހަމައެއާއެކު، ބިން ހިއްކުމާއި ބިން ބެލެހެއްޓުމުގެ މަޝްރޫއުތަކަށް ކުރި ހޭދަ 89.7 ޕަސެންޓް ފާހަގަކޮށްލެވޭ ވަރަށް އިތުރުވެފައިވާއިރު، އިމާރާތްތަކާއި ބިމުގެ ތަރައްގީއަށް ކުރި ހަރަދު ވަނީ 1.69 ބިލިއަން ރުފިޔާއަށް އަރާފައެވެ.
ހަރަދުތައް އިތުރުވުމުގައި ދުނިޔޭގެ ބާޒާރާއި ސަރަހައްދީ ހާލަތުގެ އަސަރު ވެސް ބޮޑެވެ. އެގޮތުން މެދުއިރުމަތީގެ ހަމަނުޖެހުންތަކާ ގުޅިގެން ތެލުގެ އަގު އުފުލުމުގެ ސަބަބުން، ސަބްސިޑީއަށް ކުރި ހޭދަ 58.6 ޕަސެންޓް މައްޗަށް ގޮސް 4.31 ބިލިއަން ރުފިޔާ ވަނީ ހޭދަވެފައެވެ. މީގެ އިތުރުން އާސަންދައަށް 1.94 ބިލިއަން ރުފިޔާ އަދި މުވައްޒަފުންގެ މުސާރައާއި ޕެންޝަނަށް 12.05 ބިލިއަން ރުފިޔާ ވަނީ ހަރަދުވެފައެވެ.
މާލީ ހިސާބުތައް ދައްކާ ގޮތުން، ދައުލަތުގެ ޕްރައިމަރީ ސާޕްލަސްގެ ގޮތުގައި 0.27 ބިލިއަން ރުފިޔާ ރެކޯޑުކުރެވިފައި ވީނަމަވެސް، ހަރަދުތައް ބޮޑުވުމުގެ ސަބަބުން ޖުމްލަ ފިސްކަލް ބެލެންސް މިހާރު ހުރީ 3.85 ބިލިއަން ރުފިޔާގެ ޑެފިސިޓެއްގައެވެ.
