އައްޑޫ ސިޓީ ހިތަދޫ ކިނބިވާ ސަރަހައްދުން ފުއްޓަރު ފަރާތަށް ކްލޮރިން ފާޓާތަކެއް އެޅި މައްސަލަ އެންވަޔަރަމެންޓަލް ޕްރޮޓެކްޝަން އޭޖެންސީ (އީޕީއޭ)އާއި ފުލުހުން ބަލަން ފަށައިފިއެވެ.
މި ކަމާ ގުޅިގެން ފުލުހުން ބުނީ އައްޑޫ ސިޓީ ހިތަދޫ ފުއްޓަރު ފަރާތު މޫދަށް ކްލޮރިން އަޅާފައިވާ މައްސަލަ ރިޕޯޓްކުރުމާއެކު، އެ މައްސަލަ ބަލަމުން އަންނަކަމަށެވެ. މީގެ އިތުރުން އީޕީއޭގެ ޑިރެކްޓަރު ޖެނެރަލް އިބްރާހީމް ނައީމް ވެސް، ވަނީ މި މައްސަލަ ބަލަމުންދާކަމަށް ވިދާޅުވެފައެވެ. އެހެންނަމަވެސް ކަމާއި ގުޅޭ އިދާރާތަކުން މިކަމާއި ގުޅޭ އިތުރު އެއްވެސް ތަފްސީލެއް ހާމަކޮށްފައެއް ނުވެއެވެ.
އައްޑޫ ސިޓީގެ ހިތަދޫގެ ފުއްޓަރު ފަރާތު މޫދަށް ކްލޮރިން އެޅުމުން އެ ސަރަހައްދުގައި ދިރިއުޅޭ މަސްތަކާއި ކަނޑުގެ ބައެއް ދިރުންތައް މަރުވެގެން ލައްގަން ފަށައިފައިވާއިރު އެ ސަރަހައްދުންމުއްދަތު ހަމަވެފައިވާ ކްލޮރިން ހުރި 15 ބާލިދީ ފެނިފައިވެއެވެ. ކްލޮރިންއަކީ މަސްމަހާމެއްސާއި ފަރުތަކާއި ގަސްގަހާގެއްސަށް ގެއްލުންދޭ އެއްޗެއްކަން ފާހަގަކޮށް، އައްޑޫ ނޭޗާ ޕާކުން ވަނީ ކްލޮރިން މޫދަށް އެޅުމުން ނުރައްކާތެރި މާއްދާތައް އުފެދޭތީ، އެ ސަރަޙައްދަށް ދާއިރު ރައްކާތެރިވުމުގެ ގޮތުން މާސްކެއް އެޅުމަށް އެދިފައެވެ.
މިކަމާއި ގުޅިގެން އައްޑޫ ސިޓީގެ މޭޔަރު އަލީ ނިޒާރު އެކްސްގައި ކުރެއްވި ޕޯސްޓެއްގައި ވިދާޅުވީ އެ ސަރަހައްދަށް ކްލޮރިން އަޅައިފައި ވުމުން މަހާއި ބޯވަ ފަދަ ދިރުންތައް މަރުވެގެން ލައްގަމުން އަންނަ ކަމަށެވެ. އެއީ ކޮން ބަޔަކު ގެންދިޔަ ކްލޮރިން ފާޓާތަކެއްކަން މިހާތަނަށް އެނގިފައިނުވާކަން ފާހަގަކޮށް ނިޒާރު ވިދާޅުވީ އެހާ ބައިވަރު ކްލޮރިން އާންމު ފަރާތެއްގެ ބޭނުމަށް ގެނެސްފައިވާނެ ކަމަށް ގަބޫލުނުކުރެވޭ ކަމަށެވެ. "ލަފާކުރެވެނީ އެއީ ސަރުކާރުގެ މުއައްސަސާއެއްގެ ބޭނުމަށް ގެނެސްފައިވާ ކްލޮރިން ކަމަށް" ނިޒާރު ވިދާޅުވިއެވެ.
މީގެ އިތުރުން ނިޒާރު ވަނީ އެ ސަރަހައްދަށް ވަރަށް ބޮޑަށް ކްލޮރިންގެ އަސަރުކޮށްފައިވުމާއި އެކު ސިއްހީ އިދާރާއަކުން ވަކި ގޮތެއް އަންގަން އެ ސަރަހައްދަށް މޫދަށް ނޭރުމަށް އިލްތިމާސްކޮށްފައެވެ.
