މި ސީޒަންގެ ފުރަތަމަ ކްރޫޒްލައިނާ ރާއްޖެ އައިސްފިއެވެ.
އިޓަލީއަށް ނިސްބަތްވާ "އެމްއެސް އައިޑާ ސްޓެލާ" ރާއްޖެ ބަނދަރުކޮށްފައި ވަނީ އިއްޔެ މެންދުރު 11:00 ގައެވެ. ސްވިޒަލޭންޑާއި އޮސްޓްރިއާ އަދި ޖަރުމަނު ވިލާތުގެ ފަތުރުވެރިންނަށް ހާއްސަކޮށްގެން އޮޕަރޭޓްކުރާ މި ކްރޫޒް ޝިޕް އައިސްފައި ވަނީ އޮމާންގެ މަސްކަޓުން ފުރައިގެން 2،139 ފަސިންޖަރުންނާއި 639 ފަޅުވެރިންނާއެކު އެވެ. މި ކްރޫޒާ ފުރުމަށް ހަމަޖެހިފައި ވަނީ މިއަދު ހަވީރު އެވެ.
މިއީ މޯލްޑިވްސް އެސޯސިއޭޝަން އޮފް ޔޮޓް އެޖެންޓްސް (މާޔާ) ގެ އެދުމުގެ މަތިން ރެގިއުލޭޓަރީ ބަދަލުތައް ގެނައުމަށް ފަހު ރާއްޖެއަށް އައި ފުރަތަމަ ކްރޫޒް ޝިޕްކަން ފާހަގަކޮށްލެވެއެވެ.
ރާއްޖޭގެ ފަތުރުވެރިކަން ކުރިއެރުވުމަށް މަސައްކަތް ކުރަމުންދާ މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އިން ބުނީ އޭއައިޑީއޭގެ މި ޒިޔާރަތާއެކު ރާއްޖޭގެ އިގްތިސާދަށް ބޮޑު ކުރިއެރުމެއް ލިބިގެންދާނެ ކަމަށެވެ.
އެގޮތުން މާލެ އާއި ހުޅުމާލޭގެ ސަރަޙައްދުގައި ހިންގާ ރެސްޓޯރެންޓްތަކާއި ސުވެނިއާ ފިހާރަތަކާއި ދޯނިތަކާއި ގެސްޓް ހައުސްތަކާއި ރީޓެއިލް އައުޓްލެޓްތައް ފަދަ ވިޔަފާރިތަކަށް ހެޔޮ އަސަރުތަކެއް ކުރާނެ ކަން ފާހަގަކޮށް އެމްއެމްޕީއާރްސީން އިތުރަށް ބުނީ ފަތުރުވެރިކަމުގެ ދާއިރާ ކުރިއެރުވުމަށް ވަރަށް ބޮޑު އެހީތެރިކަމެއް ލިބިގެންގޮސް، މި ސަރަޙައްދުގެ އެންމެ މަތީ ސަފުގައި ހިމަނާލެވޭ ކްރޫޒް މަންޒިލެއްގެ ގޮތުގައި ރާއްޖޭގެ މަގާމު އިތުރަށް ވަރުގަދަވެގެންދާނެ ކަމަށް ލަފާ ކުރެވޭ ކަމަށެވެ.
އަދި ހަަމައެހެންމެ ރާއްޖެއަށް މި ކްރޫޒް ލައިނާ އައުން މިއީ ރާއްޖޭގެ ފަތުރުވެރިކަމުގެ ދާއިރާ ކުރިއެރުވުމަށް ކުރަމުންދާ މަސައްކަތްތަކަށް ލިބުނު ބޮޑު ކާމިޔާބީއެއް ކަމަށާއި އެއާއެކު ރާއްޖޭގެ އިގްތިސާދު ހަރުދަނާވުމުގެ އިތުރުން، ބޭރުގެ ރިޒާވް އިތުރުވެ، ގައުމުގެ އިގްތިސާދީ ކުރިއެރުމަށް ވެސް މަގުފަހިވެގެންދާނެ ކަމަށް ވެއެވެ.
އޭއައިޑީއޭ ރާއްޖެއައުމާއެކު ލިބުނު މި ކާމިޔާބީގެ އިތުރުން ރާއްޖެއިން މިފަހުން ވަނީ ޑަބްލިއުޓީއޭގެ ވޯލްޑްސް ލީޑިން ޑެސްޓިނޭޝަންގެ މަގާމު ޖެހިޖެހިގެން ފަސް ވަނަ ފަހަރަށް ދިފާއުކޮށް ފުރަތަމަ ފަހަރަށް ވޯލްޑްސް ލީޑިން ގްރީން ޑެސްޓިނޭޝަންގެ މަގާމުވެސް ކާމިޔާބުކޮށްފައެވެ.
