"90 ޕްލަސް ގޯލްޑް ކަޕް 2024" ފުޓްބޯޅަ މުބާރާތުގެ ގްރޫޕް އޭ ގައި ހއ. ދިއްދޫ އާއި ދ. މީދޫ ބައްދަލުކުރި މެޗް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދު ޝަރަފުވެރިކޮށްދެއްވައިފިއެވެ.
ގަލޮޅު ރަސްމީ ދަނޑުގައި ރޭ ހއ. ދިއްދޫ އާއި ދ. މީދޫ ބައްދަލުކުރި މެޗް ނިމުނީ 2 – 2 އިން އެއްވަރު ވެގެންނެވެ. ރޭގެ މެޗަށް ފަހު "މޭން އޮފް ދަ މެޗް" އަށް ހޮވުނު ކުޅުންތެރިޔާއަށް ރައީސުލްޖުމްހޫރިއްޔާގެ އަނބިކަނބަލުން ވަނީ ޓްރޮފީ ހަވާލުކޮށްދެއްވާފައެވެ.
"90 ޕްލަސް ގޯލްޑް ކަޕް 2024" ފުޓްބޯޅަ މުބާރާތަކީ މުޅި ރާއްޖެއަށް ހުޅުވާލައިގެން އަމިއްލަ ފަރާތަކުން ރާވާ ހިންގާ ފުޓްބޯޅަ މުބާރާތެކެވެ. މިދިޔަ މަހުގެ 20 ގައި ފެށުނު މި މުބާރާތުގައި 17 ޓީމަކުން ވާދަކުރެއެވެ.
ފާއިތުވި އަހަރުތަކުގައި ވަޅުޖެހިފައިވާ ދިވެހި ފުޓްބޯޅައަށް އާ ރޫހެއް ގެނުވައިދިނުމުގެ އަމާޒުގައި ބާއްވާ މި މުބާރާތުގެ ޗެމްޕިއަން ޓީމަށް އެއްލައްކަ ރުފިޔާ އަދި ރަނަރަޕަށް ބައިލައްކަ ރުފިޔާގެ ފަހުރުވެރި އިނާމެއް ދިނުމަށް ވަނީ ހަމަޖެހިފައެވެ. މުޅި ރާއްޖެއަށް ހުޅުވާލައިގެން ބާއްވާ މި މުބާރާތުގެ މެޗުތައް ބަލާލުމަށް ގައުމީ ފުޓްބޯޅަ ދަނޑަށް ވަންނަން ޓިކެޓް ނަގަން ޖެހޭއިރު، ޓިކެޓް އަގުތަކަކީ 30 ރުފިޔާ އާއި، 50 ރުފިޔާ އަދި 100 ރުފިޔާއެވެ.
ޑިސެމްބަރު މަހުގެ 25 ވަނަ ދުވަހުގެ ނިޔަލަށް ކުރިއަށްދާ މުބާރާތުގެ ސަބަބުން ދިވެހި ފުޓްބޯޅައިގެ ފެންވަރު މަތިވެ، ބައިނަލްއަގުވާމީ މައިދާނުގައި ވާދަކުރެވޭ ފަދަ ގާބިލް ކުޅުންތެރިން އުފެދިގެން ދާނެ ކަމުގެ އުއްމީދު ވަނީ އާ ވެފައެވެ.
