މާލެ ސިޓީ ކައުންސިލުން ކުރި ހަރަދު ލިބޭ ގޮތަށް ހުޅުމާލޭގެ ދެވަނަ ފިޔަވަހީގައި އިމާރާތްކޮށްފައިވާ ބުޅާ ފެސިލިޓީ "އޮޅުހިޔާ" އެގްރިކަލްޗާ އެންޑް އެނިމަލް ވެލްފެއާ މިނިސްޓްރީއާ ހަވާލުކުރަން ކައުންސިލުން ނިންމައިފިއެވެ.
ކައުންސިލުން މި ނިންމުން ނިންމާފައި ވަނީ މިއަދު ބޭއްވި އެ ކައުންސިލުގެ 4 ވަނަ ދައުރުގެ 174 ވަނަ ޖަލްސާގައި ކައުންސިލް ހުރިހާ މެންބަރުންގެ އިއްތިފާގުންނެވެ.
ސިޓީ ކައުންސިލުން އިއްޔެ ބުޅާތައް ގެންދިއުމަށް ނިންމާފައިވީ ނަމަވެސް އެގްރިކަލްޗާ މިނިސްޓްރީއިން ވަނީ ފެސިލިޓީއަށް ބުޅާތައް ގެންދިޔުމަށް ހާއްސަ ޕްލޭނެއް އަދި އަމަލުކުރާނެ ގޮތުގެ އެސްއޯޕީތަކެއް ހަދާފައިވާ ކަމަށާއި އެކަންކަމަށް ރިއާޔަތް ނުކޮށް ބުޅާތައް ގެންގޮސްފިނަމަ، ބުޅާތަކުގެ ސިއްހަތަށް ގެއްލުންވެދާނެ ކަމަށް ބުނެ ބުޅާ ފެސިލިޓީއަށް ބުޅާތައް ގެންދިއުން ލަސްކުރުމަށް އިލްތިމާސްކޮށްފައެވެ.
މިއަދުގެ ޖަލްސާގައި ވާހަކަ ދައްކަވަމުން މާލޭ ސިޓީގެ މޭޔަރު އާދަމް އާޒިމް ވިދާޅުވީ ބުޅާތައް ގެންދެވޭ ވަރަށް ކެޓް ޝެލްޓާ ތައްޔާރުކޮށް ނިމިފައިވާ ކަމަށާއި އިއްޔެ ބުޅާތައް ގެންދަން މަސައްކަތް ކުރި ނަމަވެސް ބުޅާ ފެސިލިޓީގެ ބައެއް ކަންކަން ނުނިމޭ ކަމަށް އެގްރިކަލްޗާ މިނިސްޓްރީއިން ބުނެފައިވާ ކަމަށެވެ.
މިނިސްޓްރީއިން އެހެން ބުނި ނަމަވެސް މިނިސްޓްރީއާ ސިޓީ ކައުންސިލާ ދެމެދު ވެފައިވާ އެއްބަސްވުމަށްވުރެ ރަނގަޅަށް ބުޅާ ފެސިލިޓީގެ މަސައްކަތްތައް ނިންމާފައިވާ ކަމަށް އާޒިމް ވިދާޅުވިއެވެ. އެގޮތުން ބުޅާ ފެސިލިޓީގެ މަސައްކަތް ނިމިފައިވާ ކަމަށާއި ޖަނަވާރުންގެ ހާއްސަ ޑޮކްޓަރުން ހަމަޖެހިފައިވާ ކަމަށާއި ބުޅަލަށްދޭ ކާނާ އަދި ބުޅާ ގެންދިއުމަށް ބޭނުންވާ ކޮށިތައް ވެސް ހޯދާފައިވާ ކަމަށް އާޒިމް ވަނީ ވިދާޅުވެފައެވެ.
އާޒިމް ވިދާޅުވީ ބުޅާ ފެސިލިޓީގެ މަސައްކަތް ކޮށްފައިވަނީ މާލެ ސިޓީ ކައުންސިލުގެ ބަޖެޓުން ކަމަށެވެ. އަދި ބުޅާ ފެސިލިޓީ މިނިސްޓްރީގެ ދަށަށް ގެންދާނަމަ ކައުންސިލުން ހޭދަކުރި ފައިސާ ކައުންސިލަށް ލިބެންޖެހޭނެ ކަމަށް ގަބޫލު ކުރައްވާ ކަމަށެވެ. އާޒިމްގެ މި ހުށަހެޅުމަށް ހުރިހާ މެންބަރުން ވެސް ވަނީ ތާއީދު ކުރައްވާފައެވެ.
