ހުޅުމާލޭގެ ދެވަނަ ފިޔަވަހީގައި އިމާރާތްކޮށްފައިވާ ބުޅާ ފެސިލިޓީ "އޮޅުހިޔާ"ގެ އޮޕަރޭޝަންތައް ހިންގުމަށް އެކަށީގެންވާ ނިޒާމެއް ނެތުމުން މިވަގުތު ބުޅާތައް އެ ފެސިލިޓީއަށް ނުގެންދިއުމަށް އެގްރިކަލްޗާ މިނިސްޓްރީ އިން ނިންމައިފިއެވެ.
އެ މިނިސްޓްރީ އިން ނެރުނު ބަޔާނެއްގައި ބުނެފައިވަނީ ފެސިލިޓީއަށް ބުޅާތައް ގެންދިޔުމަށް ހާއްސަ ޕްލޭނެއް ހަދާފައިވާ ކަމަށާއި، އަމަލުކުރާނެ ގޮތުގެ އެސްއޯޕީތަކާއި ލަފާތައް މިނިސްޓްރީ އިން މާލެ ސިޓީ ކައުންސިލާ ހިއްސާކޮށްފައި ވީނަމަވެސް މިހާތަނަށް މާލެ ސިޓީ ކައުންސިލުން އެއްވެސް ހިޔާލެއް ނުވަތަ ކޮމެންޓެއްވެސް ލިބިފައިނުވާކަމަށެވެ.
އެހެންކަމުން އެ ކައުންސިލުން މިހާރު ރާވާފައިވާގޮތަށް މަގުމަތީގައި ވީއްލިގެން އުޅޭ ބުޅާތައް އޮޅުހިޔާއަށް މިވަގުތު ގެންދިއުމަކީ އެގްރިކަލްޗާ މިނިސްޓްރީ އަށް ފެންނަ ކަމެއް ނޫންކަމަށް އެ މިނިސްޓްރީ އިން ވަނީ ބުނެފައެވެ. އަދި އެސްއޯޕީތަކަށް ރިއާޔަތް ނުކޮށް އެތަނަށް ބުޅާތައް ގެންދަން ފަށައިފިނަމަ ބުޅާތަކުގެ ސިއްހަތަށާއި ދުޅަހެޔޮކަމަށް ނޭދެވޭ އަސަރުތަކެއް ކުރުން އެކަށީގެންވާކަމަށް އެ މިނިސްޓްރީ އިން ވަނީ ބުނެފައެވެ.
އެގްރިކަލްޗާ މިނިސްޓްރީ އިން ބުނީ އޮޅުހިޔާގައި އޮޕަރޭޝަންތައް ހިންގުމަށް އެކަށީގެންވާ ނިޒާމެއް މިވަގުތު ގާއިމުވެފައިނެތް ކަމަށާއި ނަމަވެސް މި ނިޒާމު އެކުލަވާލުމަށްފަހު މާލެ ސިޓީ ކައުންސިލާ ހިއްސާކޮށްފައިވާނެ ކަމަށެވެ. މީގެތެރޭގައި ބުޅާތައް ކަރަންޓީނުކުރުމާއި، ފަރުވާދިނުމާއި އަދި ސްޕޭކުރުމަށް ވަކިވަކިން ތަންތަން ކަނޑައަޅާފައިވާކަމަށް އެ މިނިސްޓްރީ އިން ވަނީ ބުނެފައެވެ. މިކަން ފާހަގަކޮށް މިނިސްޓްރީ އިން ބުނީ މި ފަދައިން އަމަލުނުކޮށްފިނަމަ އޮޅުހިޔާގެ ރަސްމީ މަސައްކަތް ފެށުމުގެ ކުރިން ބުޅާތައް ބައިތިއްބާ ސަރަހައްދު އެއްކޮށް ފިއުމިގޭޓު ކުރަން ޖެހޭނެ ކަމަށާއި މި ޕްރޮސެސް ހިންގާއިރު އެއްވެސް މީހަކު ނުވަތަ ޖަނަވާރެއް އެތަނުގައި ހުރެގެން ނުވާނެ ކަމަށެވެ.
އެހެންކަމުން މިހާރު އޮޅުހިޔާއަށް ގެންދަން ރާވާ ބުޅާތައް ބައިތިއްބާނެ އިތުރު ތަނެއް ނެތް ކަމަށާއި މިކަމުގެ ސަބަބުން އޮޅުހިޔާގެ ހިދުމަތްދިނުމުގެ މަސައްކަތް ފެށުން ލަސްވާނެ ކަމަށެވެ.
މީގެއިތުރުން އޮޅުހިޔާގައި އުފެދޭ ނުރައްކާތެރި ބަޔޮލޮޖިކަލް ވޭސްޓު ނައްތާލާނެ އިންތިޒާމެއް އަދި ގާއިމުވެފައިނުވާކަމަށާއި، އެތަނަށް ގެންދާ ބުޅާތަކަށް އެކަށީގެންވާ ކާނާއާއި ފެން ފޯރުކޮށްދޭނެ ނިޒާމުގެ އިތުރުން ހިދުމަތް ދިނުމަށް ދިނުމަށް ބޭނުންވާ ބޭހާ ބުޅާތަކަށް އަޅާލާނެ އެއްވެސް މުވައްޒަފަކު ހަމަޖެހިފައިނުވާކަން ފާހަގަކުރަމުން އެގްރިކަލްޗާ މިނިސްޓްރީ އިން ބުނީ މި ސަބަބުތަކަށްޓަަކައި އެތަނަށް މިވަގުތު ބުޅާތައް ގެންދިއުމަށް ނުފެންނަ ކަމަށެވެ.
ޗޮކުންދިިޔައީ އުތަ؟