ހުޅަނގު މޫސުން ނިމޭ ދުވަސްވަރާ ދިމާކޮށް ފުވައްމުލައް ސިޓީއަށް ފުޅަނގި އެރުމަކީ އާންމުކަމެކެވެ. ފުވައްމުލަކު ހުޅަނގު ފަރާތު ގޮނޑުދޮށަށް ފުޅަނގި އަރާއިރު، ފުޅަނގި ނަގަން ނުވަތަ ހިފަން ދިއުމަކީ ފުވައްމުލަކުގެ ގިނަ ބަޔަކު ވަރަށް ޖޯޝާއި ފޯރީގައި ކުރަމުން އަންނަކަމެކެވެ. ފުވައްމުލަކު ބަހުރުވައިން ކިޔާ "ހުޅަންމަހަ" ނަގަން ގޮސް ކޮންމެ މީހަކުވެސް ބަލަނީ އެންމެ ގިނައިން އެ ނެގޭތޯއެވެ. އުދިހިލާފައި އަންނަ ފުޅަނގިތައް ބައެއް ފަހަރު އެއްގަމަށް ޖައްސާއިރު، ބައެއް ފުޅަނގިތައް މޫދަށްވެސް ޖައްސައެވެ. މި ފުޅަނގިތައް ނެގުމަށް މޫދަށް އެރި އެޖަހާ ސަކަރާތަކީ މުޅިން ތަފާތު ހިތްހަމަޖެހުމެއް ގެނުވާކަމެކެވެ. ފުވައްމުލައް ވަށައިގެން މާކަނޑު އޮތުމުން އެހާ ގިނައިން އެ ރަަށަށް ފުޅަނގި އަރާ ސަބަބެއްކަމަށް ގިނަ ބަޔަކު ގަބޫލުކުރެއެވެ. ފުޅަނގި އަރާ ދުވަސްވަރު ރަށުގައި ކަންނެލީގެ މަސްވެރިކަމާއި ހަނދީގެ މަސްވެރިކަން ރަނގަޅުކަމަށް އެ ރަށު މީހުން ބުނެއެވެ.
މިފަހަރު ވެސް ފުވައްމުލައް ސިޓިއަށް ފުޅަނގި އަރަން ފަށާފައިވާއިރު، ކޮންމެ ދުވަހަކު ރަށުގެ ކުދި ބޮޑު އެންމެން ފުޅަނގި ނެގުމަށް ގޮސް ގޮޑުދޮށު ފުރާލައެވެ. ގިނަ ދުވަސްތަކަކަށްފަހު މީގެ ހަފްތާއެއްހާ ދުވަސްކުރިން އަނެއްކާ ވެސް ގިނަ އަދަދަކަށް ފުޅަނގި ލައްގަން އަންނައިރު 'ދަ ޕްރެސް' އާއި ވާހަަކަދެއްކި ފުވައްމުލަކު މީހަކު ބުނީ މި ދުވަސްވަރު އެ ރަށަށް މަސް ލައްގަނީ ހަވީރާއި އިރާދަމާއި ފުރަދަމުގައި ކަމަށެވެ. އަދި މި ހުރިހާ ގަޑިތަކެއްގައިވެސް އަތިރިމަތިން މީހުން ހުސްނުވާކަމަށް އެ ރަށުން ވާހަކަ ދެއްކި ފަރާތުން ވަނީ ބުނެފައެވެެ.
މިދުވަސްވަރަކީ ރާއްޖޭގެ އެކި ހިސާބުތަކަށް މޫސުމް ގޯސް ދުވަސްވަރަކަށްވާއިރު، ފުވައްމުލައް ސިޓީގެ މީހުންނަށް، ވާރޭތެރޭގައި ހުޅަނގި ނެގުމުގެ ފޯރި އަދި މާ ގަދައެވެ. ބައެއް މީހުން ކޯޓުލައިގެން ފުޅަނގި ނަގަން އުޅޭއިރު، ބައެއް މީހުން ވާރެއާއި ތެމިގެންވެސް މި ފޯރި ނަގަމުން ދެއެވެ. ހޯރައިން ސަލާމަތްވުމަށް ފުޅަނގިތައް އައިސް ގޮނޑުދޮށަށް ޖެހިގަންނައިރު މީހުންތައް ދުވެފައި އެ ދިމާއަށް ގޮސް މަސްތައް ނަގުމަށް އެކުރާ މަސައްކަތަކީ އަދި ވަކިން މަޖާކަމެކެވެ. މިކަމުގައި އުމުރުން ދުވަސްވީ މީހުންނާއި، ޒުވާނުންގެ އިތުރުން ކުޑަކުދިންވެސް ބައިވެރިވެއެވެ.
ފުވައްމުލައް ސިޓިއިން ވާހަކަދެއްކި އިތުރު މީހަކު ބުނީ ބައެއް ފަހަރު މުޅި ދުވަހު މަސައްކަތްކޮށްގެން އެންމެ ފުޅަނގިއެއް އަތު ނުޖެހޭ ފަހަރުވެސް އަންނަކަމަށެވެ. އެހެންނަމަވެސް އެމަޖަލުގައި ބައިވެރިވުމުންވެސް ބޮޑު ހިތްހަމަޖެހުމެއް ލިބޭކަން އެ ރަށުން ވާހަކަދެއްކި މީހާ ވަނީ ބުނެފައެވެެ. ބައެއް ފަހަރު ގިނައިން ފުޅަނގި ނެގޭ މީހުން އެހެން މީހުންނަށް ފުޅަނގިތައް ހަދިޔާކުރާ މަންޒަރަކީވެސް މި ފަދަ ކަންކަމުން ރަށުގެ އިޖްތިމާއީ ގުޅުން ބަދެހިވެގެންދާ ކަމެއްކަމުގައި ފުވައްމުލައް ސިޓީގެ މީހުން ގަބޫލުކުރެއެވެ.
ފުޅަނގި އަކީ ފަރުމަތީގައި ނުވަތަ ފަޅުތެރޭގައި އާއްމުކޮށް އުޅޭ ބާވަތުގެ މަހެއް ނޫނެވެ. މިއީ މާކަނޑުގައި އާއްމުކޮށް އުޅޭ މަހެކެވެ. ފުޅަނގި އަކީ ތޮޅި ފާޑަށް ހުންނަ، ގާތްގަނޑަކަށް ހަ އިންޗި ދިގު މަހެކެވެ. ފުޅަނގި ގޮނޑުދޮށަށް އަރަނީ، ކަންނެލިތައް ފުޅަނގި ކާންވެގެން ފަހައިގަތުމުންނެވެ. ބައެއް ފަހަރު އުދުހިގެން މައްޗަށް އަރަނިކޮށް މާހޯރަތައް އައިސް ފުޅަނގި ކާލައެވެ. ފުޅަނގިތައް ގިނަ ފަހަރަށް ގޮނޑުދޮށަށް އަރަނީ ހޯރަތަކަށް އަތު ނުވާން ވެގެންނެވެ.
އިހު ޒަމާނުގައި ފުޅަނގި އަރާކަން ދެނެގަތުމަށް ބޭނުންކުރާ އެންމެ އާންމު ގޮތަކީވެސް ގިނަ އަދަދަކަށް ހޯރަ ރަށުގެ މަތީގައި އުދުހި އުޅުމެވެ. އެއާ އެކު، މީހުން އަތިރިމައްޗަށް ގޮސް ފުޅަނގި އަރާތޯ ބަލާ އެހަބަރު މުޅި ރަށު އެންމެންނަށް ދެއެވެ. އެހާ ހިސާބުން ފެށިގެން ދަނީ ފުޅަނގި ނެގުމުގެ މަސައްކަތެވެ. ގިނައިން ފުޅަނގި އަރާ ދުވަސްވަރު ބޮޑެތި ތެލިތަކާއި ބާލިދީތައް ފުރެންދެން ފުޅަނގި ނަގައެވެެ. އާއްމުކޮށް އެ މަސް ނަގާ މީހުން ތެލުލުމަށާއި، ގަރުދިޔަ ކެއްކުމަށާއި މަސް ހިއްކައިގެން ކާން ބޭނުންކުރެއެވެ. ރާއްޖޭގެ އެހެން ބައެއް ރަށްތަކަށް ވެސް މަދުމަދުން ފުޅަނގި އަރާ، މީގެ ކުރިން އައްޑޫ ސިޓީ މީދޫ އަކީވެސް ގިނަ އަދަދަކަށް ފުޅަނގިއަރާ ރަށެެކެވެ.
