ފެނަކައިގެ ހާލަތު ރަނގަޅުކުރުމަށް އެ ކުންފުނި އެސްޓީއޯގެ ދަށަށް ބަދަލުކުރުމަށް ފަށާފައިވާ މަސައްކަތް ހުއްޓާލައިފިއެވެ.
އެސްޓީއޯގެ ދަށަށް ފެނަކަ ބަދަލުކުރަން ވަޒީރުންގެ މަޖިލީހުގެ ލަފާފުޅާ އެކު ރައީސް ޑރ. މުހައްމަދު މުއިއްޒު ނިންމެވީ މިދިޔަ އޮގަސްޓް މަހުގައެވެ. އަދި އެ މަހުގެ ފަހުކޮޅު އެމަނިކުފާނު ވަނީ އެކަން ހާމަކުރައްވައިފައެވެ.
ނަމަވެސް ފެނަކައިގެ ހާލަތު ރަނގަޅުކުރުމަށް އިތުރު ހައްލެއް ހޯދުމުގެ މަސައްކަތްކުރަމުންދާ ކަމަށް ބުނެ، ފިނޭންސް މިނިސްޓްރީން ވަނީ އެސްޓީއޯގެ ދަށަށް ފެނަކަ ބަދަލުކުރުމުގެ މަސައްކަތް މަޑުޖައްސާލިކަން ހާމަކޮށްފައެވެ. އެ މިނިސްޓްރީން އޭރު ބުނީ، ފެނަކަ އާއި ސްޓެލްކޯއާ އެއްކޮށްލުން ފަދަ އެހެން ހައްލެއް ހޯދުމަށް މަސައްކަތްކުރަމުން ދާ ކަމަށެވެ.
ސަރުކާރުން ހުށަހެޅި ބަޖެޓުގެ ތަފްސީލުގައި ވެސް ކުންފުނިތަކުގެ ހިންގުން ހަރުދަނާކުރުމަށްޓަކައި އެއް މަސައްކަތް ކުރާ ކުންފުނިތައް އެއްކޮށްލުން ފަދަ ހައްލުތައް ވެސް ހުށަހަޅާފައިވެއެވެ.
މިއަދު އެސްޓީއޯއިން ނެރުނު ބަޔާނެއްގައި ބުނީ:
- އެސްޓީއޯގެ ދަށަށް ފެނަކަ ބަދަލުކުރުމަށް ކުރަމުންދާ މަސައްކަތް ހުއްޓާލަން މިދިޔަ އާދީއްތަ ދުވަހު ފިނޭންސް މިނިސްޓްރީން އަންގާފައިވާ ކަމަށް
- އެސްޓީއޯއިން ސަރުކާރަށް ހުށަހެޅި ޕްރޮޕޯސަލް ކުރިއަށް ގޮސްފައިވާ މިންވަރަށް ބެލުމަށް ފަހު، ފެނަކައިގެ ހިއްސާ ގަތުމުގެ މަސައްކަތް ހުއްޓާލަން ކުންފުނީގެ ބޯޑުން މިއަދު ނިންމާފައިވާ ކަމަށް
ފާހަގަކުރެވޭ ގޮތުގައި ފެނަކައިން އެންމެ ބޮޑު ދަރަންޏެއް ދައްކަން ޖެހިފައިވަނީ އެސްޓީއޯއަށެވެ. އެގޮތުން އެސްޓީއޯއިން ކްރެޑިޓަށް ނެގި ތެލަށް ފެނަކައިން ދެ ބިލިއަން ރުފިޔާ ދައްކަން ޖެހިފައި އެބަ އޮތެވެ.
އެސްޓީއޯގެ އިތުރުން އެހެން ފަރާތްތަކަށް ދައްކަން ޖެހޭ ފައިސާއާ އެކު ފެނަކައިގެ ދަރަނި 4.1 ބިލިއަން ރުފިޔާއަށް އަރައެވެ.
