މާލޭ މަގުމަތީގައި ވެއްޓިފައި އޮއްވާ ފެނިގެން ހޮސްޕިޓަލަށް ގެންގޮސް ފަރުވާ ދެނިކޮށް މީހަކު މަރުވެއްޖެ ކަމަށް ކުރިން ރިޕޯޓް ކުރިނަމަވެސް އެމީހާ ވެއްޓުނީ އާޓިފިޝަލް ބީޗްގައި ހުންނަ ކެފޭގައި އިންދާ މެޔަށް ތަދެއް އަރައިގެން ކަމަށް ބުނެ ކުރިން ބުނި ވާހަކަ ފުލުހުން ބަދަލު ކޮށްފިއެވެ.
ފުލުހުން ބުނީ، ކުރިން އެހެން ބުނެވުނީ އޭރު މައުލޫމާތު ލިބުނު ގޮތަށް ކަމަށެވެ.
މި ހާދިސާގައި މަރުވެފައި ވަނީ ސ. ހިތަދޫ ސޯސަންގެ އުމުރުން 53 އަހަރުގެ އަހްމަދު ޝަރީފް ކަމަށް ފުލުހުން މައުލޫމާތު ދެއެވެ.
ފުލުހުން ބުނީ މިހާދިސާ ހިނގީ މިއަދު ހެނދުނު 8:56 ހާއިރު ކަމަށާއި ފުލުހުން އެޓެންޑްވެ އޭޑީކޭ ހޮސްޕިޓަލަށް އެމީހާ ގެންގޮސްފައިވާ ކަމަށެވެ.
އޭޑީކޭގައި ފަރުވާދެމުން ދަނިކޮށް ހެނދުނު 10:03 ހާއިރު އެ މީހާ މަރުވެފައިވާ ކަމަށް ހޮސްޕިޓަލުން ފުލުހުންނަށް މައުލޫމާތު ދީފައިވާ ކަމަށް ފުލުހުން ވަނީ ބުނެފައެވެ.
ފުލުހުން އިތުރަށް ބުނީ މި ހާދިސާއާ ގުޅިގެން ބަލަންޖެހޭ ކަންކަން ބަލަމުންދާ ކަމަށެވެ.
