ވިސާއާ ނުލައި 30 ދުވަހަށް ތަޖިކިސްތާނަށް ދެވޭ ގޮތް ހަދައިފިއެވެ.
ދިވެހިރާއްޖެއާއި ތަޖިކިސްތާނާ ދެމެދު ވިސާ އެގްޒެމްޝަން އެއްބަސްވުމެއްގައި ސޮއިކޮށްފައި ވަނީ މިއަދުއެވެ.
މި އެއްބަސްވުމުގައި ސޮއިކުރުމާއިއެކު، މިހާރުވެސް އަމަލުކުރަމުންދާ ޔުނިލެޓަރަލް ވިސާ-ފްރީ ރެޖީމްގެ ދަށުން ވިސާއާއި ނުލާ 30 ދުވަހުގެ މުއްދަތަށް ދެ ގައުމުގެ ރައްޔިތުން ދަތުރުކުރުމަށް އޮންނަ އުސޫލު ރަސްމީވެގެންދާނެ ކަމަށް ފޮރިން މިނިސްޓްރީއިން ބުނެއެވެ.
ނިއުޔޯކްގައި މިއަދު ސޮއިކުރެއްވި މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ، އދ އަށް ކަނޑައަޅުއްވާފައި ހުންނަވާ ދިވެހިރާއްޖޭގެ ދާއިމީ މަންދޫބު ޑރ. އަލީ ނަސީރު މުހައްމަދުއެވެ. އަދި ތަޖިކިސްތާން ސަރުކާރުގެ ފަރާތުން ސޮއި ކުރެއްވީ އެ ގައުމުން އދ އަށް ކަނޑައަޅުއްވާފައި ހުންނަވާ ދާއިމީ މަންދޫބު ހިކްމަތު ޖޮނިބެކް އިސްމޮއިލް އެވެ.
ހެންލީ އެންޑް ޕާޓްނާސް އިން ނެރޭ، އިންޑެކްސްގައި މިއަހަރު ވެސް ރާއްޖެއަށް ވަނީ ދެކުނު އޭޝިއާގެ އެންމެ ބާރުގަދަ ޕާސްޕޯޓުގެ މަގާމު ލިބިފައެވެ. ހެންލީ އެންޑް ޕާޓްނާސް އިން ނެރޭ، އިންޑެކްސް އަކީ ދުރާލާ ވިސާ ހޯދުމެއް ނެތި، ފަސޭހަކަމާ އެކު އެތެރެވޭ ޕާސްޕޯޓުތައް ބަލައިގެން ނެރޭ އިންޑެކްސް އެކެވެ.
ވޭތުވެދިޔަ ތިން އަހަރު ވެސް ރާއްޖެއިން ދެކުނު އޭޝިޔާގެ އެންމެ ބާރުގަދަ ޕާސްޕޯޓްގެ މަގާމު ހިފަހައްޓާފައިވާއިރު، ވިސާ ހޯދުމެއް ނެތި ރާއްޖޭގެ ޕާސްޕޯޓުގައި 90 އަށްވުރެ ގިނަ ގައުމަށް ދަތުރު ކުރެވެއެވެ.
