ވޯލްޑް ޓްރެވަލް އެވޯޑްސް 2024 ގެ ރާއްޖެއަށް ޝަރަފުވެރި 9 އެވޯޑެއް ލިބިއްޖެއެވެ.
ދުނިޔޭގެ އެކި ކަންކޮޅުތަކުން ފަތުރުވެރިކަމުގައި ހަރަކާތްތެރިވާ ފަރާތްތަކުން ބައިވެރިވި މި އެވޯޑު ހަފްލާގައި ރާއްޖެއަށް އެވޯޑު ލިބިފައިވާ ކެޓެގަރީތަކަކީ:
- ދުނިޔޭގެ އެންމެ ކުރިއަރާފައިވާ މަންޒިލް 2024
- ދުނިޔޭގެ އެންމެ ކުރިއަރާފައިވާ ފެހި މަންޒިލް
- ދުނިޔޭގެ ލީޑިން ސީޕްލޭން އޮޕަރޭޓާ 2024 - ޓްރާންސް މޯލްޑިވިއަން އެއާވޭސް
- ދުނިޔޭގެ ލީޑިން އެއާޕޯޓް ރިސޯޓް 2024 - ހުޅުލޭ އައިލެންޑް ހޮޓެލް، މޯލްޑިވްސް
- ދުނިޔޭގެ ލީޑިން ބޫޓިކް އެއާޕޯޓް ހޮޓެލް 2024 - ޖެން މޯލްޑިވްސް މާލޭ ބައި ޝަންގްރިއްލާ
- ދުނިޔޭގެ ލީޑިން ލަގްޒަރީ ހަނީމޫން ރިސޯޓް 2024 - ވައްކަރޫ މޯލްޑިވްސް
- ދުނިޔޭގެ ލީޑިން ލަގްޒަރީ އައިލެންޑް ރިސޯޓް 2024 - ދަ ސެއިންޓް ރެޖިސް މޯލްޑިވްސް ވޮމްމޫލީ ރިސޯޓް
- ދުނިޔޭގެ ލީޑިން ޕްރައިވެޓް އައިލެންޑް ރިސޯޓް 2024 - ވެލާ ޕްރައިވެޓް އައިލެންޑް، މޯލްޑިވްސް
- ދުނިޔޭގެ ލީޑިން ވޯޓާ ވިލާ ރިސޯޓް 2024 - އެމަރަލްޑް މޯލްޑިވްސް ރިސޯޓް އެންޑް ސްޕާ
1993 ވަނަ އަހަރު ދޭންފެށި ވޯލްޑް ޓްރެވަލް އެވޯޑަކީ ޓްރެވަލް އަދި ޓޫރިޒަމްގެ ދުނިޔޭގައި އެންމެ ޝަރަފުވެރި އަދި އެންމެ މަގުބޫލު އެއް އެވޯޑެވެ. ފަތުރުވެރިކަމުގައި، އަދި ދަތުރުފަތުރުގެ ސިނާއަތުގައި އެންމެ ފާހަގަކޮށްލެވޭ އެންޑޯސްމަންޓެއް ރަމްޒުކޮށްދޭ މި އެވޯޑްތަކުގެ މަގުސަދަކީ ދުނިޔޭގެ ފެންވަރުގައި ދަތުރުފަތުރާއި ފަތުރުވެރިކަމުގެ ހުރިހާ ދާއިރާއަކުން ހޯދާފައިވާ ކާމިޔާބީތައް ފާހަގަކޮށް އިނާމު ދިނުމެވެ.
އެމްއެމްޕީއާރްސީން ބުނީ މި އެވޯޑްތައް ލިބުމަކީ ރާއްޖެއަށް ޒިޔާރަތްކުރާ ފަރާތްތަކުގެ މެދުގައި ހައި ޕްރޮފައިލް ލަގްޒަރީ މަންޒިލެއްގެ ގޮތުގައި ރާއްޖޭގެ ތަސައްވުރު އިތުރުވެގެންދާނެ ކަމެއް ކަމަށެވެ. އަދި މި އެވޯޑްތަކަކީ ރާއްޖެއަށް ޒިޔާރަތްކުރާ ފަރާތްތަކުން ރާއްޖެއާއި މެދު އޮންނަ ލޯތްބާއި އިތުބާރު ދައްކުވައިދޭ އެވޯޑެއްކަމުގައި އެމްއެމްޕީއާރްސީން ވަނީ ބުނެފައެވެ. ވިޒިޓް މޯލްޑިވްސް އަކީ ދުނިޔޭގެ އެކި ކަންކޮޅުތަކުން ޒިޔާރަތްކުރާ ފަރާތްތަކަށް ހަނދާން ނައްތާނުލެވޭނެ ފަދަ ތަޖުރިބާތައް ފޯރުކޮށްދިނުމާއި، ގައުމުގެ ފަތުރުވެރިކަމުގެ ދާއިރާ ޕްރޮމޯޓްކޮށް ތަރައްގީކުރުމުގައި ގައުމުން ކުރާ މަސައްކަތުގެ ޝަރަފެއްގެ ގޮތުގައި އެމްއެމްޕީއާރްސީން ވަނީ ފާހަގަކޮށްފައެވެ.
