އައިޖީއެމްއެޗުގައި މަސައްކަތް ކުރި ފިލިޕީންސްގެ ނަރުހެއް ކަމަށްވާ މޭރީ ގްރޭސްއޮނެޑް ޕިނެޑާގެ މަރުގެ މައްސަލައިގައި ޝަރީއަތް ނިމެންދެން ބަންދުކޮށްފައި ހުރި ހަލީމަތު ލަމްހާ ބަންދުން ދޫކޮށްލި މައްސަލަ ހައިކޯޓުގައި އިސްތިއުނާފު ކުރަން ހުށަހެޅި ނަމަވެސް އެ މައްސަލަ ބަލައިނުގަންނަން ނިންމި ނިންމުން މުރާޖައާކޮށް ދޭން އެ ކޯޓުގެ ފަނޑިޔާރުންގެ މަޖިލީހަށް ހުށަހަޅަން ޕްރޮސެކިއުޓާ ޖެނަރަލް (ޕީޖީ) އޮފީހުން ނިންމައިފި އެވެ.
މޭރީ މަރާލި ކަމުގެ ތުހުމަތުގައި ލަމްހާ ހައްޔަރު ކުރީ ޑިސެމްބަރު 16، 2021 ގައެވެ. އެއަށްފަހު ނޮވެމްބަރު 23، 2023ގައި ޝަރުތުތަކާއެކު ދޫކޮށްލުމަށް އެދުމުން ކްރިމިނަލްކޯޓުން އޭނާ ބަންދުން ދޫކޮށްލި ނަމަވެސް، ޕީޖީއިން އެ މައްސަލަ ހައިކޯޓުގައި އިސްތިއުނާފު ކުރުމާއެކު ހައިކޯޓުގެ އަމުރަށް އަލުން އޭނާ ވަނީ ބަންދުކޮށްފައެވެ.
އެއަށްފަހު ޝަރީއަތްތައް ލަސްވަމުންދާތީ ލަމްހާ ބަންދުން ދޫކޮށްލުމަށް އޭނާ އެދިފައި ވަނިކޮށް މި މަހުގެ 12 ވަނަ ދުވަހު ކްރިމިނަލް ކޯޓުން ވަނީ އޭނާ ބަންދުން ދޫކޮށްފައެވެ. ލަމްހާ ބަންދުން ދޫކޮށްފައި ވަނީ ރާއްޖެއިން ފުރައިގެން ނުދިއުމަށާއި ކޯޓުން އަންގާ ކޮންމެ ވަގުތެއްގައި ކޯޓަށް ގަޑިއަށް ހާޒިރުވުމަށާއި ޒަރޫރީ ބޭނުމެއްގައި ނޫނީ ގެއިން ބޭރަށް ނުދިއުމަށް ޝަރުތު ކުރުމަށް ފަހުގައެވެ.
ނަމަވެސް އޭނާ އަލުން ބަންދުކޮށްދިނުމަށް އެދި ޕީޖީ އޮފީހުން ހައި ކޯޓަށް މި މަހުގެ 14 ވަނަ ދުވަހު ހުށަހެޅި ނަމަވެސް އެ ކޯޓުގެ ރަޖިސްޓްރާ ވަނީ އެ މައްސަަލަ ބޭރުކޮށްލާފަ އެވެ. އެ މައްސަލަ ބަލައިނުގަތުމަށް ނިންމެވި ސަބަބަކަށް ރަޖިސްޓްރާގެ ނިންމުމުގައި ވަނީ ބަންދުން ދޫކޮށްލުމުގައި ދަށު ކޯޓުގެ ފަނޑިޔާރު ގާނޫނީ ގޮތުން ހަދާފައިވަނީ ކޮން ގޯހެއްކަން ޕީޖީ އޮފީހުން ހުށަހެޅި އިސްތިއުނާފްގައި ބަޔާންކޮށްދީފައި ނުވާތީ ކަމަށެވެ.
އެހެންކަމުން ރަޖިސްޓްރާގެ ނިންމުން މުރާޖައާކޮށްދިނުމަށް ފަނޑިޔާރުންގެ މަޖިލީހަށް މިއަދު ވަނީ ހުށަހަޅަން ނިންމާފައެވެ. ދައުލަތުން ބުނަނީ ލަމްހާ ޝަރީއަތް ނިމެންދެން ބަންދުކުރަން މީގެ ކުރިން އަމުރުކުރި ހާލަތު އަދިވެސް ބަދަލުނުވާ ކަމަށާއި އޭނާގެ ފުށުން މުޖުުތަމައުއަށް އޮތް ނުރައްކާ ކުޑަނުވާ ކަމަށެވެ.
މޭރީގެ މަރުގެ މައްސަލައިގައި ލަމްހާގެ މައްޗަށް ދައުލަތުން ތިން ދައުވާއެއް އުފުލާފައިވެއެވެ. އެއީ އެނގިހުރެ މީހަކު މެރުމުގައި ބައިވެރި ވުމުގެ ދައުވާ، އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާ އަދި ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމުގެ ދައުވާއެވެ.
މޭރީ މަރާލި ކަމުގެ ތުހުމަތުގައި އޭނާގެ ފިރިމީހާ މާވިން އެސް ވައި ވާގަސް ހައްޔަރު ކުރީ 2021 ވަނަ އަހަރުގެ އޮކްޓޯބަރު 27 ގައެވެ. އޭނާގެ މައްޗަށް ކުރަނީ އެނގިހުރެ މީހަކު މެރުމުގެ ކުށުގެ ދައުވާއެވެ.
