ގއ. ކަނޑުހުޅުދޫގައި ދެ މީހެއްގެ ދެމެދުގައި ހިނގި މާރާމާރީއެއްގައި އެ ދެ މީހުންނަންވެސް ޒަހަމްވެ ހޮސްޕިޓަލުގައި ފަރުވާދޭން ފަށައިފިއެވެ.
ފުލުހުން ބުނީ މާރާމާރީ ހިނގާފައި ވަނީ ރޭ އިރާ ކޮޅު ކަމަށެވެ. އަދި މާރާމާރީ ހިންގި ދެ މީހުންނަށްވެސް އަނިޔާވެ ގއ. ވިލިނގިލީގައި ހުންނަ ހޮސްޕިޓަލުގައި ފަރުވާ ދެމުންދާ ކަމަށް ފުލުހުން ވަނީ މައުލޫމާތު ދީފައެވެ.
އެ މީހުންގެ ވަނަވަރު ހާމަކޮށްފައި ނުވާއިރު އެ ހަމަނުޖެހުން ހިނގާފައި ވަނީ އުމުރުން 37 އަހަރުގެ ފިރިހެނަކާއި 40 އަހަރުގެ ފިރިހެނަކާ ދެމެދު ކަމަށް ފުލުހުން ބުނެއެވެ.
ހަމަ އެހެންމެ ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
ރޭ ހުޅުމާލޭ ފުރަތަމަ ފިޔަވަހީގައި ވެސް މީހަކަށް ތޫނު އެއްޗަކުން ހަމަލާދޭން އުޅުނުކަމުގެ ތުހުމަތުގައި ވަނީ މީހަކު ހައްޔަރު ކޮށްފައެވެ. އެ މައްސަލައިގައި ފުލުހުން ހައްޔަރުކުރީ އދ. ދަނގެތި، ލިލީގެ، އުމުރުން 33 އަހަރުގެ ހުސެއިން ފާއިގު އެވެ.
