ފަލަސްތީނުގައި އިޒްރޭލުން ހިންގަމުންދާ ގަތުލުއާންމުތަކާ ގުޅިގެން، އިޒްރޭލުގެ ޕާސްޕޯޓުގައި މީހުން އެތެރެވުން މަނާކުރުމަށް އިމިގްރޭޝަންގެ ގާނޫނަށް ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް ހުށަހެޅުއްވި އިސްލާހުގެ މަސައްކަތް އަވަސްކުރަން ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީން ނިންމައިފިއެވެ.
މީގެ ގާތްގަނޑަކަށް ދެ ހަފްތާ ކުރިން ބޭއްވި ބައްދަލުވުމުގައި ކޮމިޓީން ނިންމީ އިސްލާހުގެ މަސައްކަތް ފެބްރުއަރީ މަހުގެ ނިޔަލަށް ދަންމާލައި އެ މަސް ނިމުމުގެ ކުރިން ކޮމިޓީ މަރުހަލާ ނިންމާލުމަށެވެ. އަދި އިސްލާހާ ގުޅޭގޮތުން މަޝްވަރާކުރުމަށް ކަމާބެހޭ ފަރާތްތައް ހާޒިރުކުރަން ވެސް ނިންމިއެވެ.
މިއަދުގެ ބައްދަލުވުމުގައި ކޮމިޓީ އަށް ހާޒިރުވި މެންބަރުންގެ އިއްތިފާގުން ނިންމީ ކަމާބެހޭ ފަރާތްތައް މާދަމާއިން ފެށިގެން ހާޒިރުކުރަން ފަށައި، އިސްލާހުގެ މަސައްކަތް އަވަސްކުރުމަށެވެ. މި ބައްދަލުވުމުގައި އެ ހުށަހެޅުއްވުން ހުށަހެޅުއްވީ ހުޅުދޫ ދާއިރާގެ މެންބަރު މުހައްމަދު ޝާހިދެވެ.
މީކާއީލް ހުށަހެޅުއްވި އިސްލާހު މަޖިލީހުން ބަލައިގަތީ މިދިޔަ ޖޫން މަހުގެ 10 ވަނަ ދުވަހުގައެވެ. ނަމަވެސް އެ އިސްލާހުގެ މަސައްކަތް ފަސް މަސް ވަންދެން މަޑުޖައްސާލައި ބޭއްވުމަށް ފަހު، މަސައްކަތް ފެށީ މި މަހުގެ 12 ވަނަ ދުވަހުގައެވެ.
އިޒްރޭލުގެ ޕާސްޕޯޓުގައި މީހުން އެތެރެވުން މަނާކުރުމުގެ މަސައްކަތް ލަސްވެފައިވާތީ ގިނަ އާންމުންނާއި އިދިކޮޅުގެ ފާޑުކިއުންތައް ވަނީ ސަރުކާރަށް އަމާޒުވެފައެވެ.
