ކުރިއަށް އޮތް ރިޔާސީ އިންތިހާބުގައި އިދިކޮޅު އެމްޑީޕީގެ ފަރާތުން ވާދަކުރާނެ ކެންޑިޑޭޓެއް ކަނޑައެޅުމަށް ބާއްވާ ޕްރައިމަރީގައި ވާދަކުރައްވާނެ ކަން، އެ ޕާޓީގެ ޗެއާޕާސަން ފައްޔާޒް އިސްމާއީލް އިއުލާނުކުރައްވައިފިއެވެ.
އެކަން އިއުލާނުކުރައްވައި އެމްޑީޕީގެ ގައުމީ މަޖިލީހުގެ ވަޓްސްއަޕް ގްރޫޕަށް ފޮނުއްވި މެސެޖެއްގައި، ނިމިދިޔަ ސަރުކާރުގެ އިކޮނޮމިކް މިނިސްޓަރުގެ މަގާމު ވެސް ފުރުއްވި ފައްޔާޒް ވަނީ، ޕާޓީގެ އެންމެހާ މެންބަރުންގެ ތާއީދަށް އެދިވަޑައިގެންފައެވެ.
ފައްޔާޒް މިފަދައިން ވިދާޅުވިއިރު، ކުރީގެ ރައީސް އިބްރާހީމް މުހައްމަދު ސޯލިހު ވަނީ، ރިޔާސީ އިންތިހާބުގައި ވާދަކުރައްވާނެކަން ނުވަތަ ނުކުރައްވާނެ ކަން ފަހުން ހާމަކުރައްވާނެ ކަމަށް ވިދާޅުވެފައެވެ.
'ރާއްޖެ ޓީވީ'ގެ 'ފަށާއިރު' ޕްރޮގްރާމަށް މިދިޔަ އާދީއްތަ ދުވަހު ދެއްވި ހާއްސަ ބަސްދީގަތުމެއްގައި ސޯލިހު ވިދާޅުވީ، އެމަނިކުފާނުގެ ސިޔާސީ ކުރިމަގާ ގުޅޭގޮތުން އެމްޑީޕީގެ އިސް ބޭފުޅުންނާ މަޝްވަރާކުރައްވާފައިވާނެ ކަމަށާއި، ކުރިއަށް ވަޑައިގަންނަވާނެ ގޮތް ވެސް ހިއްސާކުރައްވާފައި ވާނެ ކަމަށެވެ.
އަދި ރަނގަޅު ވަގުތުގައި ނިންމެވުން ހާމަކުރައްވާނެ ކަމުގައި އެމަނިކުފާނު ވިދާޅުވިއެވެ.
