މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ އަސާސީ ގަވާއިދަށް އެ ޕާޓީގެ ކުރީގެ ޗެއާޕާސަން ފައްޔާޒް އިސްމާއީލް ހުށަހެޅުއްވި އިސްލާހުތަކުގެ ތެރެއިން، ޕާޓީގެ ހުރިހާ ބާރުތަކެއް ޗެއާޕާސަނަށް ލިބޭގޮތަށް ހަދައި އެ ބަދަލުތައް ގަނޑުކޮށް ފާސްކުރަން އުޅޭ މައްސަލައިގައި ކޮންގްރެސްގެ ބައެއް މެންބަރުންގެ މެދުގައި ބޮޑެތި ކަންބޮޑުވުންތަކެއް އުފެދިއްޖެއެވެ.
މިހާރު ކުރިއަށްދާ އެމްޑީޕީގެ 5 ވަނަ ކޮންގްރެސްގައި ފައްޔާޒް ހުށަހެޅުއްވި އިސްލާހުތަކުގެ ތެރޭގައި ޕާޓީގެ ލީޑާޝިޕަށް ބޮޑެތި ބަދަލުތަކެއް ގެނައުން ހިމެނެއެވެ. އެގޮތުން އިތުރު ނައިބު ޗެއާޕާސަނެއް ހަމަޖެއްސުމާއި، ކޮންގްރެސް އެކުލެވިގެންވާ ގޮތަށް ބަދަލު ގެނައުމާއި، ގައުމީ މަޖިލީހަށް މެންބަރުން އިތުރުކުރުމުގެ އިތުރުން، ޕާޓީގެ ރިޔާސީ ކެންޑިޑޭޓު ތަބާވާންޖެހޭ އުސޫލުތައް ކަނޑައެޅުން ހިމެނެއެވެ.
މި އިސްލާހުތަކަށް ކޮންގްރެސްގެ ގިނަ މެންބަރުންތަކެއް ތާއީދުކުރި ނަމަވެސް، ބައެއް މެންބަރުން ވަނީ މި ބަދަލުތަކާ މެދު ވަރަށް ބޮޑަށް ހިތްހަމަނުޖެހުން ފާޅުކޮށްފައެވެ. ވަކިން ހާއްސަކޮށް، އާބާދީއަށް ބަލައި ގައުމީ މަޖިލީހަށް މެންބަރުން އިތުރު ކުރުމަށާއި، ޕާޓީގެ ބައެއް މަގާމުތައް އުވާލައި ހުރިހާ ބާރުތަކެއް ޗެއާޕާސަނަށް ޖަމާވާ ގޮތަށް ހުށަހަޅާފައިވާ މާއްދާތަކަށް ބައެއް މެންބަރުން ވަނީ ފާޅުގައި ދެކޮޅު ހަދާފައެވެ. އަދި މިއީ ޕާޓީގެ ތެރޭގައި ހުދުމުހުތާރު އުސޫލުތަކެއް ގާއިމުކުރުން ކަމަށް ބައެއް މެންބަރުން ވަނީ ސިފަކޮށްފައެވެ. މީގެއިތުރުން ހުރިހާ އިސްލާހަކަށް ވަކިވަކިން ބަހުސްނުކޮށް، އެއްފަހަރާ ގަނޑުކޮށް ވޯޓަށް އެހުމަކީ ޑިމޮކްރެޓިކް ހަމަތަކާ މުޅިން ހިލާފު ކަމެއް ކަމަށް ވެސް މެންބަރުން ދަނީ ބުނަމުންނެވެ.
މެންބަރުންގެ މި ކަންބޮޑުވުންތަކަށް ރައްދު ދެއްވަމުން ފައްޔާޒް ވިދާޅުވީ، އޭނާ މި އިސްލާހުތައް ހުށަހެޅުއްވީ ގަވާއިދަށް އިސްލާހު ހުށަހެޅުމަށް ޕާޓީން ހުޅުވާލި ރަސްމީ ފުރުސަތުގެ ތެރެއިން ކަމަށެވެ. އަދި ކޮންގްރެސް ފަދަ ބޮޑު އެއްވުމެއްގައި ކޮންމެ މާއްދާއަކަށް ވަކިވަކިން ވޯޓަށް އެހުމަކީ ކުރީގެ ތަޖުރިބާތަކަށް ބަލާއިރު ވެސް އަމަލީ ގޮތުން ދަތި އަދި އުނދަގޫ ކަމެއް ކަމަށް ފައްޔާޒް ވިދާޅުވިއެވެ.
