އެމްޑީޕީގެ އިންތިހާބުތަކުގެ އިންސާފުވެރިކަން ކަށަވަރުކުރުމަށް އަސާސީ ގަވާއިދަށް ބޮޑެތި އިސްލާހުތަކެއް ހުށަހަޅައިފިއެވެ.
މިރޭ ފެށުމަށް ހަމަޖެހިފައިވާ އެމްޑީޕީގެ ކޮންގްރެސްއަށް ހުށަހަޅާ މި އިސްލާހުތަކަކީ 2022 ވަނަ އަހަރުން ފެށިގެން އަމަލުކުރަމުންދާ އަސާސީ ގަވާއިދަށް ގެންނަ މުހިންމު ބަދަލުތަކެކެވެ.
މީގެ ތެރެއިން އެންމެ ފާހަގަކޮށްލެވޭ އެއް ކަމަކީ، ޕާޓީގެ މުވައްޒަފުން އެތެރޭގެ އިންތިޚާބުތަކުގައި ވާދަކުރުމާއި، ކެންޑިޑޭޓުންނަށް ތާއީދުކޮށް ކެމްޕޭން ކުރުން މަނާކުރާ މާއްދާ އިތުރަށް ހަރުދަނާކުރުމެވެ.
އަސާސީ ގަވާއިދަށް ހުށަހަޅާފައިވާ އާ އިސްލާހުތަކުގެ ތެރޭގައި ސެކްރެޓޭރިއަޓްގެ މުވައްޒަފަކު އެތެރޭގެ އިންތިހާބެއްގައި ވާދަކުރަން ބޭނުންނަމަ، އިންތިހާބު ބޭއްވުމުގެ މަދުވެގެން އެއް މަސް ދުވަސް ކުރިން ޗެއާޕާސަނަށް ލިޔުމުން އަންގަންޖެހޭނެއެވެ. އެފަދަ އެންގުމަކާއެކު، އިންތިހާބު ނިމެންދެން އެ މުވައްޒަފަކު މަސްއޫލިއްޔަތުން ދުރުކުރެވޭނެއެވެ. އަދި އިންތިހާބުވެއްޖެނަމަ، ސެކްރެޓޭރިއަޓްގެ ވަޒީފާއިން އަމިއްލައަށް ވަކިވާނެކަމަށް ބުނެފައިވެއެވެ.
ސެކްރެޓޭރިއަޓްގެ އެއްވެސް މުވައްޒަފަކު ކެންޑިޑޭޓަކަށް ތާއީދުކޮށް، އަމަލީ ގޮތުން ކެމްޕޭން ހަރަކާތްތަކުގައި ބައިވެރިވުމަކީ މަނާކަމެއްކަން ފާހަގަކޮށް މުވައްޒަފެއްގެ މަސްލަހަތު ފުށުއަރާ ފަރާތެއް އިންތިހާބުގައި ވާދަކުރާނަމަ ނުވަތަ އިންސާފުވެރިކަމާމެދު ސުވާލު އުފެދޭ ހާލަތެއް އޮތްނަމަ އެ މުވައްޒަފަކު މަގާމުގެ މަސްއޫލިއްޔަތުން ވަގުތީގޮތުން ދުރުކުރުމުގެ ބާރު އިންތިހާބު ހިންގާ ކޮމިޓީއަށް ލިބިގެންވާކަމަށް ބަޔާންކޮށްފައިވެއެވެ.
މި އިސްލާހުތައް އަންނަ ހޮނިހިރު ދުވަހު ފާސްކުރުމަށް ތައްޔާރުވަމުންދާއިރު، ސިޔާސީ މަޝްރަހު ދިރާސާކުރާ ފަރާތްތަކުން ދެކޭގޮތުގައި މިއީ ޕާޓީގެ އެތެރޭގެ ސިޔާސީ ވާދަވެރިކަމާ ގުޅިގެން ހުށަހެޅުނު އިސްލާހެކެވެ.
ހާއްސަކޮށް އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން އިއުލާންކުރައްވާފައިވާ ކުރީގެ ޗެއާޕާސަން ފައްޔާޒު އިސްމާއީލްގެ ކެމްޕޭންގައި، ޕާޓީގެ މިހާރުގެ ޗެއާޕާސަން އަދި ކުރީގެ ރައީސް މުހައްމަދު ނަޝީދާއި، ނައިބު ޗެއާޕާސަން މުހައްމަދު ޝިފާޒު އަމަލީގޮތުން ބައިވެރިވެވަޑައިގަންނަވަމުންދާ ދަނޑިވަޅެއްގައެވެ.
