އިޒްރޭލު ޕާސްޕޯޓުގައި ރާއްޖެއަށް އެތެރެވުން މަނާކުރުމާ ގުޅޭގޮތުން ސިޔާސީ ޕާޓީތަކާއި ކަމާބެހޭ އިދާރާތައް ދެކޭގޮތް ހޯދުމަށާއި، އިޒްރޭލުގެ ޕާސްޕޯޓުގައި ރާއްޖެއަށް އެތެރެވާ މީހުންގެ ތަފާސްހިސާބުތައް ހޯދުމަށް، ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީން ނިންމައިފިއެވެ.
ކޮމިޓީ ބައްދަލުވުމުގައި މިއަދަށް އެޖެންޑާކުރީ އިޒްރޭލު ޕާސްޕޯޓުގައި ރާއްޖެއަށް އެތެރެވުން މަނާކުރުމަށް އިމިގްރޭޝަން ގާނޫނަށް ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް ހުށަހެޅުއްވި އިސްލާހު ދިރާސާކުރުމުގެ މަސައްކަތެވެ. އެ މަސައްކަތް ނިންމާލުމަށް ކޮމިޓީން ކަނޑައެޅީ އަންނަ ފެބްރުއަރީ މަހުގެ ނިޔަލަށެވެ.
މި ބައްދަލުވުމުގައި ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހްމަދު ނާޒިމް ދެ ހުށަހެޅުމެއް ހުށަހެޅުއްވިއެވެ. އެއީ:
- އިޒްރޭލު ޕާސްޕޯޓު މަނާކުރުމާ ގުޅޭގޮތުން ކަމާބެހޭ ފަރާތްތަކުގެ ހިޔާލު ލިއުމުން ހޯދުމަށް، އަދި މައުލޫމާތު އޮޅުންފިލުވަން އެދޭނަމަ ކޮމިޓީއަށް ހާޒިރުކުރުމަށް
- އިޒްރޭލު ޕާސްޕޯޓުގައި ވޭތުވެދިޔަ ފަސް އަހަރު ރާއްޖެ އެތެރެވި މީހުންގެ ތަފާސްހިސާބުތައް ހޯދައި އެ މީހުން ރާއްޖެ އެތެރެވި ސަބަބު ހޯދުމަށް އިމިގްރޭޝަނަށް ސިޓީ ފޮނުވުމަށް
ނާޒިމް ވިދާޅުވީ، އިޒްރޭލުގެ ޕާސްޕޯޓު ގެންގުޅޭ މީހުން އެތައް ގައުމެއްގައި ދިރިއުޅެމުންދާ ކަމަށާއި، އޭގެ ތެރޭގައި އެމެރިކާ އާއި ދެކުނު އެމެރިކާގެ ގައުމުތަކާއި ފަލަސްތީނާއި އުރުދުން ވެސް ހިމެނޭ ކަމަށެވެ. އެހެންވެ އެކަމާ ގުޅުންހުރި މައުލޫމާތު އިމިގްރޭޝަންގައި ހުރިތޯ ބެލުމަށް އެ އިދާރާ އަށް ފޮނުވުމަށް ނާޒިމް ހުށަހެޅުއްވިއެވެ.
"ދެން އަޅުގަނޑަށް ފްލޯގަ މީގެ ކުރިން ދެކެވުނު ވާހަކަތަކަށް ބަލާއިރު އަދި މި ކޮމިޓީގަ ވެސް ބައެއް ބޭފުޅުން ދައްކަވާފަ ހުރި ވާހަކަތަކަށް ބަލާއިރު އަޅުގަނޑުމެންނަށް ބުރައެއް ނުވެވޭ ބްލެންކަޓް ބޭންއެއް އިޒްރޭލުގެ ޕާސްޕޯޓަކަށް ވީތީ އިމްޕޯޒް ކުރާކަށް،" ނާޒިމް ކުރިއަށް ގެންދެވިއެވެ.
"ސަބަބަކީ އިޒްރޭލުގެ ޕާސްޕޯޓު އޮންނަ އަރަބިން ވެސް މުސްލިމުން ވެސް އުޅޭތީ،"
އދ އާއި އެހެނިހެން ޖަމިއްޔާތަކާއި ގައުމުތަކުން ދަތިކުރުމުގެ ފިޔަވަޅުތައް އަޅަނީ ހަނގުރާމަކުރުމާއި އިންސާނީ ހައްގުތަކަށް އަރައިގަންނަ ފަރާތްތަކަށް ކަން ފާހަގަކުރައްވައި ނާޒިމް ހުށަހެޅުއްވީ އިޒްރޭލުގެ ސަރުކާރުގެ ވެރިންނާއި ސިފައިންނަށް ރާއްޖެ އަށް އެތެރެނުވެވޭ ގޮތް ހެދުމަށެވެ.
އެއާއެކު ވެސް، މި މަސައްކަތް އަވަސްކުރަން ޖެހޭ ކަމަށް ވެސް ނާޒިމް ވިދާޅުވިއެވެ.
މާފަންނު އުތުރު ދާއިރާގެ މެންބަރު މުހައްމަދު ނާޒިމް ވިދާޅުވީ، އިޒްރޭލުގެ ޕާސްޕޯޓުގައި އެތެރެވުން މަނާކުރުމުގެ ސަބަބުން ރާއްޖެއަށް އިގްތިސޯދީގޮތުން ކުރިމަތިވާނެ ގެއްލުންތަކަކީ ކޮބައިކަން ދެނެގަންނަން ޖެހޭ ކަމަށެވެ. މީގެ ކުރިން ވެސް ވިދާޅުވިހެން ނާޒިމް ވިދާޅުވި ގޮތުގައި އިޒްރޭލުގެ ޕާސްޕޯޓުގައި އެތެރެނުވެވޭ ގޮތް ހެދުމުގެ ވާހަކަ ދެކެވެނީ ސިޔާސީ މަގްސަދެއް ހާސިލްކުރުުމަށްޓަކައެވެ.
"ހަގީގަތުގަ އެކަކު ވެސް މިކަން ކުރާކަށް ބޭނުމެއްނޫން، މިއީ ހަގީގަތަކީ ފެކްޓަކީ މިއީ، އެހެންނަމަވެސް ކޮންމެވެސް ބައެއްގެ ބޮލުގައި މިކަން ކުރަން އެޅުވުމަށްޓަކައި ކުރާ ކަމެއް މިއީ،" އޭނާ ވިދާޅުވިއެވެ.
ކޮމިޓީގެ ބައްދަލުވުމުގައި މިއަދު ނިންމާފައިވަނީ ސިޔާސީ ޕާޓީތަކާއި ބަންޑާރަނައިބުގެ އޮފީހާއި އިކޮނޮމިކް މިނިސްޓްރީ އާއި ޓޫރިޒަމް މިނިސްޓްރީ އާއި ފޮރިން މިނިސްޓްރީ އާއި އިމިގްރޭޝަންގެ އިތުރުން މަޓީ އާއި މަޓާޓޯ އާއި ފަތުރުވެރިކަމުގައި ހަރަކާތްތެރިވާ އެހެނިހެން ޖަމިއްޔާތަކުގެ ވެސް ހިޔާލު ހޯދުމަށެވެ.
