ހިސޯރުކޮށްފައިވާ ފަލަސްތީނުގެ ބިންތަކުގައި ގަތުލުއާންމު ހިންގަމުންދާތީ އިޒްރޭލުގެ ޕާސްޕޯޓު މަނާކުރަން ހުށަހެޅި އިސްލާހުގެ މަސައްކަތް އަވަސްކުރުމަށް ގޮވާލާ ރައްޔިތުންގެ މަޖިލީހަށް ހުށަހެޅި ގަރާރު ބޭރުކޮށްލައިފިއެވެ.

ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް ހުށަހެޅުއްވި ގަރާރުގައި ވިދާޅުވީ، ފަލަސްތީނުގައި އިޒްރޭލުން ހިންގަމުންދާ ގަތުލުއާންމު ކުށްވެރިކޮށް ބަޔާން ނެރުން ފިޔަވައި ސަރުކާރުން އެެއްވެސް ފިޔަވަޅެއް އަޅާފައިނުވާ ކަމަށެވެ.

އިޒްރޭލުގެ ޕާސްޕޯޓު މަނާކުރުމަށް އިމިގްރޭޝަން ގާނޫނަށް ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް އިސްލާހެއް ހުށަހަޅާފައި އޮއްވާ އިޒްރޭލުގެ ޕާސްޕޯޓު މަނާކުރަން ސަރުކާރުން ވަޒީރުންގެ މަޖިލީހުގެ ބައްދަލުވުމެއް ބާއްވައި އެގޮތަށް ނިންމިކަން ފާހަގަކުރައްވައި މުހައްމަދު ވިދާޅުވީ، ސަރުކާރުގެ އެ ނިންމުމުގައި އަމަލީ ސިފައެއް ޖެއްސުމަށް އެއްވެސް މަސައްކަތެއް ކޮށްފައި ނުވާ ކަމަށެވެ.

އަދި ސަރުކާރުގެ މެޖޯރިޓީ އޮންނަ ރައްޔިތުންގެ މަޖިލީހުން އެހެނިހެން މަސައްކަތްތައް އަވަހަށް ނިންމަމުންދާ ކަން ވެސް އެ ގަރާރުގައި އޭނާ ފާހަގަކުރެއްވިއެވެ.

މި ގަރާރަށް ބަހުސް ކުރުމަށް ފަހު ގަރާރު ބަލައިގަންނަން ފެނޭތޯ ރިޔާސަތުން ވޯޓަށް އެހުމުން ވޯޓުގައި ބައިވެރިވި މެންބަރުންގެ ތެރެއިން 15 މެންބަރަކު ގަރާރު ބަލައިގަތުމަށް ވޯޓުދެއްވިއިރު، 63 މެންބަރަކު ވޯޓުދެއްވީ ގަރާރު ބަލައިގަތުމާ ދެކޮޅަށެވެ. އަދި އެއް މެންބަރަކު ވަކި ކޮޅަކަށް ވޯޓު ނުދެއްވާ އިންނެވިއެވެ.

ހަބަރު ރައްޔިތުންގެ މަޖިލިސް އިސްރާއީލް ފަލަސްތީން