ފުވައްމުލަކު ސިޓީގެ ބަނދަރު ސަރަޙައްދުން ޓޫރިޒަމް ބޭނުމަށް ބިން ކުއްޔަށް ދޫކުރުމަށް މީގެ ކުރިން ކޮށްފައިވާ އިއުލާން ބާތިލުކޮށް، އަލުން އިއުލާންކޮށްފިއެވެ.
ފުވައްމުލަކު ސިޓީގެ ބަނދަރު ސަރަޙައްދުން ޓޫރިޒަމް ބޭނުމަށް ބިން ކުއްޔަށް ދޫކުރުމަށް އެންމެ ފުރަތަމަ އިއުލާންކޮށްފައިވަނީ މިއަހަރު ސެޕްޓެމްބަރު 05 ވަނަ ދުވަހުއެވެ. އެހެންނަމަވެސް އެ އިއުލާން ބާތިލުކޮށް ކައުންސިލުން އިއްޔެ ކުރި އިއުލާނުގައި ބުނީ މި ސަރަހައްދުން ދޫކުރެވޭ ބިންތަކަކީ ބަނދަރު ސަރަޙައްދުން ޑައިވިން ސްކޫލްގެ ބޭނުމަށް ދޫކުރުމަށް ހަމަޖެހިފައިވާ ބިންތަކެއް ކަމަށެވެ. އެހެންކަމުން ފުވައްމުލަކު ބަނދަރު ސަރަޙައްދުން ދޫކުރެވޭ 1200 އަކަފޫޓްގެ 09 ބިން ކުއްޔަށް ނެގުމަށް ޝައުގުވެރިވާ ފަރާތްތަކުން ނޮވެމްބަރު 25 ވަނަ ދުވަހުގެ 13:00 ގެ ކުރިން ބިޑް ހުށަހެޅުމުގެ ފުރުސަތު ހުޅުވާލާ ކަމަށެވެ.
މީގެ އިތުރުން ކައުންސިލުން ބުނީ ބިޑް ޑޮކިއުމެންޓަސް 100 ޑޮލަރަށް ވިއްކުމަށް ހަމަޖެހިފައިވާއިރު، ބީލަން ހުށަހެޅުމާއި ބީލަން ހުޅުވުން އޮންނާނީ ޑިސެމްބަރު 12، 2024 ވަނަ ދުވަހު ކަމަށެވެ.
'ދަ ޕްރެސް' އަށް މައުލޫމާތު ދެމުން ފުވައްމުލައް ސިޓީ ކައުންސިލުން ބުނީ ކުރިން ކޮށްފައިވާ އިއުލާން ބާތިލުކޮށް އަލުން ބަނދަރު ސަރަޙައްދުން ޓޫރިޒަމް ބޭނުމަށް ބިން ކުއްޔަށް ދޫކުރުމަށް އިއުލާންކޮށްފައިވަނީ މައުލޫމާތު ޝީޓަށް އައި ބަދަލުތަކާއި ގުޅިގެން ކަމަށެވެ. އެހެންނަމަވެސް އެކަމާއި ގުޅޭ އިތުރު ތަފްސީލެއް ކައުންސިލުން ހާމަކޮށްފައެއް ނުވެއެވެ.
ފުވައްމުލައް ސިޓީގައި ފަތުރުވެރިކަން ކުރިއަރާ، ތަރައްގީވަމުން އަންނައިރު އެ ރަށުގެ ޓައިގާ ޝާކް ޕޮއިންޓާއި، ގުދުރަތީ ރީތި ވެށީގެ ސަބަބުން ފަތުރުވެރިން ޒިޔާރަތްކުރާ ނިސްބަތް އަންނަނީ ވަރަށް ބޮޑަށް އިތުރުވަމުންނެވެ.
