މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިފަހުން ގެޒެޓްކޮށް އަމަލުކުރަން ފަށާފައިވާ ބޭރު ފައިސާގެ މުއާމަލާތްތައް ކުރުމުގެ ގަވައިދާ އެއްގޮތަށް ޑޮލަރު މާރު ނުކުރެވޭނެ ކަމަށް ރާއްޖޭގެ ފަތުރުވެރިކަމުގެ އެއް ބާނީ އަދި ޔުނިވާސަލް އެންޓަޕްރައިސަސްގެ ޗެއާމަން މުހައްމަދު އުމަރު މަނިކު (އެމްޔޫ މަނިކު) މިއަދު އަންގަވައިފި އެވެ.
ޔުނިވާސަލް ކުންފުނީގެ ދަށުން އެމްޔޫ މަނިކު ހިންގަވަމުންދާ 8 ރިސޯޓު ކަމުގައިވާ ކުރުނބާ މޯލްޑިވްސް، ވެލައްސަރު މޯލްޑިވްސް، ބަރޮސް މޯލްޑިވްސް، ހުވަފެންފުށި މޯލްޑިވްސް، ކުރަމަތި މޯލްޑިވްސް، މިލައިދޫ މޯލްޑިވްސް، އަދި ދިގަލި މޯލްޑިވްސްގެ ނަމުގައި މިއަދު އެމްއެމްއޭގެ ގަވަރުނަރު އަހުމަދު މުނައްވަރަށް ފޮނުއްވި ސިޓީގައި ވިދާޅުވެފައި ވަނީ ޑޮލަރު މާރުކުރަން ޖެހޭ ގަވާއިދު ހަދާފައި ވަނީ ޓޫރިޒަމް ދާއިރާގައި އުޅުއްވާ ފަރާތްތަކާ މަޝްވަރާކުރުމެއް ނެތި، ރިސޯޓް ހިންގާ މީހުންނަށް އިންސާފުވެރި ގޮތަކަށް ނޫން ކަމަށެވެ.
އަދި ހަމައެހެންމެ ރިސޯޓުތަކުން ކުރާ ހަރަދުގެ 90 ޕަސެންޓަކީ ޑޮލަރުން ކުރާ ހޭދަ ކަމަށް ވާއިރު، އާ ގަވާއިދުގައި އެކަމަށް ބަލާފައި ނުވާ ކަމަށާއި ކޮންމެ ޓޫރިސްޓަކަށް 500 ޑޮލަރު މާރުކުރަން ކަނޑައަޅާފައި ވަނީ ރޫމް ރޭޓާއި ރާއްޖޭގައި ހޭދަކުރާ މުއްދަތު އަދި ގެސްޓުން އަންނަނީ ދަރިން ގޮވައިގެންކަން ނުވަތަ ނޫން ކަންވެސް ސާފުކުރުމެއްނެތި ކަމަށް އެ ސިޓީގައި ބަޔާންކޮށްފައި ވެއެވެ.
މީގެ އިތުރުންވެސް 250 ޑޮލަރަށް ވިއްކާ ރޫމެއްގައި ހަތަރު ރޭ ތިބޭ ޓޫރިސްޓުންނަށް ލިބޭ 1،000 ޑޮލަރުގެ އާމްދަނީ އަށް ބަލައި 2،000 ޑޮލަރު މާރުކުރަން ޖެހޭ ގޮތަށް ނުހެދޭނެ ކަމަށް އެމްޔޫ މަނިކު ވިދާޅުވެފައި ވެއެވެ. އަދި ހަަމައެހެންމެ ޔުނިވާސަލްގެ ހުރިހާ އެކައުންޓެއް ހުޅުވާފައި ހުރީ ރާއްޖޭގައި ކަމަށާއި ކޮންމެ ރިސޯޓެއްގެ އަހަރީ އާމްދަނީ 30 ޕަސެންޓަށްވުރެ މަތީ އަދަދެއް ޓެކްސްގެ ގޮތުގައި ދައުލަތަށް ގަވާއިދަށް ދައްކަމުންދާ ކަމަށް އެ ސިޓީގައި ވެއެވެ.
އެހެންކަމުން ސިޓީގައި ބަޔާން ކުރެއްވި ކަންކަން އިސްލާހުކޮށް، ޓޫރިޒަމް ދާއިރާ އަށް ފައިދާވާނެ ގޮތަކަށް ގަވާއިދު ބަދަލުކުރުމަށް އެމްޔޫ މަނިކު ވަނީ ސަރުކާރުގެ ކަމާ ގުޅޭ އިދާރާތަކަށް ގޮވާލައްވާފައެވެ.
ޔުނިވާސަލް އިން މިފަދައިން ގޮވާލާފައިވާއިރު އެ ގަވާއިދަށް އަމަލު ކުރުމާ ދެކޮޅަށް ރާއްޖޭގެ އެންމެ ބޮޑު ވިޔަފާރިވެރިޔާ ޗަމްޕާ މުހައްމަދު މޫސާ (އުއްޗު) ވެސް ވަނީ ވާހަކަ ދައްކަވާފައެވެ. އުއްޗުގެ ރިސޯޓްތައް ހިންގާ ތިން ކުންފުނި ކަމަށްވާ ޗަމްޕާލާސް ހޯލްޑިންގްސް، ކޮމަންޑޫ ހޯލްޑިންގްސް އަދި ކުރެއްދޫ ހޯލްޑިންގްސްއިން އެމްއެމްއޭއަށް އިއްޔެ ފޮނުއްވި ސިޓީގައި ބުނެފައި ވަނީ އެމްއެމްއޭގެ އާ ގަވައިދަކީ ބޭރު ފައިސާގެ މުއާމަލާތްތައް ކުރުމުގެ ގަވާއިދަކީ ޓޫރިޒަމް ދާއިރާގެ ވިޔަފާރިތަކަށް ވަރަށް ބޮޑު ގޮންޖެހުމެއް އަދި ބޭއިންސާފެއް ކަމަށެވެ.
އެމްއެމްއޭއިން ކަނޑައަޅާފައިވާ އާ ގަވައިދުގައި ވާގޮތަށް ކޮންމެ ރިސޯޓަކަށް އަންނަ ޓޫރިސްޓެއްގެ ބޮލަށް 500 ޑޮލަރު މާރުކުރުމަކީ ކުރެވޭނެ ކަމެއް ނޫން ކަމަށާއި، އެކަމުގެ ސަބަބުން ރިސޯޓްތަކަށް ލިބޭ އާމްދަނީއަށް ވުރެ އިތުރަށް ހަރަދުކުރަން ޖެހޭނެކަމަށް އެ ސިޓީގައި ވަނީ ބުނެފައެވެ.
ފަތުރުވެރިކަމުގެ ދާއިރާގެ ހުރިހާ ފެސިލިޓީތަކަކުން ވެސް ކަނޑައަޅާފައިވާ ވަކި އަދަދެއް ބޭންކުތައް މެދުވެރިކޮށް މާރުކުރަން ޖެހޭ ގޮތަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ވަނީ ބޭރު ފައިސާގެ ގަވާއިދަށް އިސްލާހެއް ގެނެސްފައެވެ. މިއީ ބޭރު ފައިސާއިން ލިބޭ އާމްދަނީ ރާއްޖޭގައި ހިފެހެއްޓުން ހަރުދަނާކޮށް ބޭރު ފައިސާގެ ލިކުއިޑިޓީ އިތުރުކުރުމުގެ ގޮތުން އެޅި ފިޔަވަޅެއް ކަމަށް އެމްއެމްއޭއިން ބުނެއެވެ.
މި އިސްލާހާއެކު ދިވެހިރާއްޖެއަށް ޒިޔާރަތްކުރާ ޓޫރިސްޓުންގެ ތެރެއިން ރިސޯޓްތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ގެސްޓްހައުސްތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ މަގުން ބޭންކަށް ޑޮލަރު މާރުކުރުން އެ ގަވާއިދުގެ ދަށުން ވަނީ ލާޒިމުކޮށްފައެވެ. އަދި އެކަމާ ގުޅިގެން ޓޫރިޒަމް ސިނާއަތުގައި މަސައްކަތް ކުރާ ވިޔަފާރިވެރިން އަދި ބައެއް ސިޔާސީ ފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ.
އެކަކުކިއަވާފައި ދެވަނަމީހަ ހުރީކިހިނެއް ކަން އެގިލަށްވާނީ މަތީފަރާތައް މޮޔައިންގެ ގުރޫޕަކާއި ގައުމު ހިންގަންހަވާލު ކުރުމުން ދިމާވާނެ ކަންތައް ފެންނަމުން މިދަނީ