ދިވެހިރާއްޖޭގެ ޓޫރިޒަމްގެ ބާނީއެއް ކަމަށް މުހައްމަދު އުމަރު މަނިކު (އެމްޔޫ މަނިކު) އެންމެ ފަހުގެ އުންމީދަކީ މިސްކިތެއް ބިނާ ކުރެއްވުން ކަމުގައި އިސްލާމިކް މިނިސްޓަރު ޑރ. ޝަހީމް އަލީ ސައީދު ވިދާޅުވެއްޖެއެވެ.
ޝަހީމް ވިދާޅުވީ އެމްޔޫ މަނިކަކީ ދީނީ އިޖްތިމާއީ އަދި ތައުލީމީ ކަންތައްތަކާއި މީހުން ބިނާކުރުމަށް ވަރަށް ބޮޑު އަހައްމިއަޔަތުކަމެއް ދެއްވި ބޭފުޅެއްކަމަށާއި، މިސްކިތްތައް ބިނާކުރުމާއި މަރާމާތު ކުރުމަށް އެހީތެރިކަން ދެއްވި ބޭފުޅެއް ކަމަށެވެ. އަދި އެމްޔޫ މަނިކު އަވަހާރިވި އާލާސްކަންފުޅާ ގުޅިގެން ސިންގަޕޫރަށް ފުރުމުގެ ކުރިން ވެސް ހުޅުމާލެ ސަރަހައްދުގައި ބޮޑު މިސްކިތެއް ބިނާކުރެއްވުމަށް ސިޓީއެއް މިނިސްޓްރީ އަށް ފޮނުވާފައިވާ ކަމަށް ޝަހީމް ވަނީ ވިދާޅުވެފައެވެ.
އަދި މިސްކިތަށް ބޭނުންވާ ޖާގަ ހުޅުމާލޭ ސަރަހައްދުން ހަމަޖައްސައިދީފައިވާ ކަމަށްވެސް ޝަހީމް ވަނީ ވިދާޅުވެފައެވެ.
ފާހަގަކުރެވޭ ގޮތުގައި އެމްޔޫ މަނިކަކީ ފަތުރުވެރިކަންް ރާއްޖެއަށް ތައާރަފު ކުރެއްވުމުގައި އިސް ދައުރެއް އަދާކުރެއްވި ބޭފުޅެކެވެ.
އެމްޔޫ މަނިކު އެންމެފަހުން އަދާކުރައްވާފައި ވަނީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ޗެއާމަންގެ މަގާމެވެ. އެ މަގާމުން އިސްތިއުފާދެއްވާފައި ވަނީ މިދިޔަ އަހަރުގެ ޖެނުއަރީ މަހުގެ ތެރޭގައެވެ. އެމްއޭސީއެލްގެ ބޯޑާ 2013 ވަނަ އަހަރު ގުޅިވަޑައިގެން އެމްޔޫ މަނިކު ވަނީ އެމްއޭސީއެލްއަށް 10 އަހަރު ހިދުމަތް ކުރައްވާފައެވެ.
އެމްޔޫ މަނިކުއަކީ ޔުނިވާސަލް އެންޓަޕްރައިސަސް ލިމިޓެޑްގެ ޗެއާމަންއެވެ. އެމަނިކުފާނަކީ މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީޒް (މަޓީ)ގެ ކޯ-ފައުންޑާ އަދި ޗެއާމަންވެސް މެއެވެ. މީގެއިތުރުން އެމަނިކުފާނު ވަނީ ސަރުކާރުގެ އިސް މަގާމުތައް ވެސް އަދާކުރައްވާފައެވެ.
1982 ވަނަ އަހަރު އެމްޔޫ މަނިކަށް ފަތުރުވެރިކަމުގެ ދާއިރާއިން އާންމު ހިދުމަތުގެ ހިތްވަރު ދިނުމުގެ އިނާމު ލިބިވަޑައިގެންފައިވާއިރު އެ މަނިކުފާނަށް ވަނީ އެ ދާއިރާއިން 2002 ވަނަ އަހަރު ޝަރަފުވެރި ކަމުގެ އިނާމު ލިބިވަޑައިގެންފައެވެ. މިނިވަން 25ގެ އާންމު ހިދުމަތުގެ އިނާމުވެސް އެމަނިކުފާނަށް ވަނީ ލިބިވަޑައިގެންފައެވެ.
