65 އަހަރުވުމުން ދޭ އިނާޔަތް މަދުން އާމްދަނީ ލިބޭ މީހުންނަށް އެކަނި ދޭން ނިންމައިފިއެވެ.
އަންނަ އަހަރަށް ލަފާކޮށް ރައްޔިތުންގެ މަޖިލިހަށް ހުށަހަޅާފައިވާ ބަޖެޓުގައިވާ ގޮތުން، ދައުލަތުގެ ހަރަދުތައް ކުޑަކުރުމަށްޓަކައި އަންނަ އޭޕްރީލް މަހުން ފެށިގެން މިހާރު ޕެންޝަން ސްކީމުގެ ތެރެއިން 65 އަހަރުވުމުން ކޮންމެ މީހަކަށް ވެސް ދައުލަތުން ދޭ 5،000 ރުފިޔާގެ އިނާޔަތް، "ޓާގެޓެޑް ޕެންޝަން" އަކަށް ބަދަލުކުރުމަށް ވަނީ ނިންމާފައެވެ.
އެހެންކަމުން އަންނަ އޭޕްރީލް މަހުން ފެށިގެން މި ޕެންޝަން ލިބޭނީ 65 އަހަރު ވެފައިވާ މީހުންގެ ތެރެއިން ފޯރުންތެރިކަމަށް ބަލައި އެންމެ މަދުން އާމްދަނީ ލިބޭ މީހުންނަށް އެކަންޏެވެ. ނަމަވެސް 65 އަހަރުވެ ޕެންޝަންގެ ފައިސާ މިހާރުވެސް ލިބެމުންދާ އެއްވެސް ފަރާތަކަށް އެ އިނާޔަތް ނުކަނޑާނެ ކަމަށް ސަރުކާރުން ވަނީ ބުނެފައެވެ.
އަލަށް އަމަލުކުރާ އުސޫލު ތަންފީޒުކުރަން ފަށާނީ އެޕްރީލް މަހުން ފެށިގެން އަލަށް ސްކީމަށް ވަންނަ މީހުންނަށް ކަމަށް ފާހަގަކުރަމުން ސަރުކާރުން ބުނީ މި ކަންކަމުގެ ސަބަބުން މުއައްސަސާތަކުގެ މެދުގައި ދޭ އިނާޔަތްތަކުގެ ފަރަގު ނައްތާލެވިގެން ދާނެ ކަމަށެވެ.
މީގެއިތުރުން އާސަންދަ އަށް ކުރާ ހޭދަ ކުޑަކުރުމަށްޓަކައި އެންމެ މުއްސަނދިން އަންނަ އަހަރުން ފެށިގެން ވަކި އަދަދެއް އެ ނިޒާމަށް ދައްކަންޖެހޭ ގޮތަށް ބަދަލު ގެންނަން ވެސް ވަނީ ނިންމާފައެވެ. އެގޮތުން އާމްދަނީގެ ގޮތުގައި މަހަކު 60،000ރ. އަށް ވުރެ ބޮޑު އާމްދަނީ ލިބޭ ނުވަތަ އިންކަމް ޓެކްސް ދައްކަން ޖެހޭ މީހުންގެ އަތުން އާސަންދައަށް ވަކި އަދަދެއް ނަގަން ވަނީ ކަނޑައަޅާފައެވެ
ވެރިކަންކުރަން ނޭގުނީމަ ދެން އެންމެ ރަނގަޅީ ސަލާން ބުނެފަ ފާބައިގެން ދިއުން، ރައްޔަތުން އިތުރައް ބިކަނުކޮއް.