އައިޖީއެމްއެޗުގައި މަސައްކަތް ކުރި ފިލިޕީންސްގެ ނަރުހެއް ކަމަށްވާ މޭރީ ގްރޭސްއޮނެޑް ޕިނެޑާގެ މަރުގެ މައްސަލައިގައި ޝަރީއަތް ނިމެންދެން ބަންދުކޮށްފައި ހުރި ހަލީމަތު ލަމްހާ ޝަރުތުތަކާއެކު ބަންދުން ދޫކޮށްލައިފިއެވެ.
މޭރީ މަރާލި ކަމުގެ ތުހުމަތުގައި ލަމްހާ ހައްޔަރު ކުރީ އެ އަހަރުގެ ޑިސެމްބަރު 16، 2021 ގައެވެ. އެއަށްފަހު ނޮވެމްބަރު 23، 2023ގައި ޝަރުތުތަކާއެކު ދޫކޮށްލުމަށް އެދުމުން ކްރިމިނަލްކޯޓުން އޭނާ ބަންދުން ދޫކޮށްލި ނަމަވެސް، ޕީޖީއިން އެ މައްސަލަ ހައިކޯޓުގައި އިސްތިއުނާފުކުރުމާއެކު ހައިކޯޓުގެ އަމުރަށް އަލުން އޭނާ ބަންދުކޮށްފައިވެއެވެ.
ޝަރުތުތަކަކާއެކު ލަމްހާ ބަންދުން ދޫކޮށްލުމަށް ކްރިމިނަލްކޯޓުން ނިންމާފައި ވަނީ ޝަރީއަތް ލަސްވަމުންދާތީ ބަންދުން ދޫކޮށްދިނުމަށް ލަމްހާ އެދިފައި ވަނިކޮށެވެ. އޭނާ ބަންދުން ދޫކޮށްލާފައި ވަނީ 3 މަސް ދުވަހުގެ މުއްދަތަކަށެވެ.
ރާއްޖެއިން ފުރައިގެން ނުދިއުމަށާއި ކޯޓުން އަންގާ ކޮންމެ ވަގުތެއްގައި ކޯޓަށް ގަޑިއަށް ހާޒިރުވުމަށާއި ޒަރޫރީ ބޭނުމެއްގައި ނޫނީ ގެއިން ބޭރަށް ނުދިއުމަށް ކޯޓުން ވަނީ ލަމްހާގެ މައްޗަށް ޝަރުތުކޮށްފައެވެ.
މޭރީގެ މަރުގެ މައްސަލައިގައި ލަމްހާގެ މައްޗަށް ދައުލަތުން ތިން ދައުވާއެއް އުފުލާފައިވެއެވެ. އެއީ އެނގިހުރެ މީހަކު މެރުމުގައި ބައިވެރި ވުމުގެ ދައުވާ، އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާ އަދި ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމުގެ ދައުވާއެވެ.
މޭރީ މަރާލި ކަމުގެ ތުހުމަތުގައި އޭނާގެ ފިރިމީހާ މާވިން އެސް ވައި ވާގަސް ހައްޔަރު ކުރީ 2021 ވަނަ އަހަރުގެ އޮކްޓޯބަރު 27 ގައެވެ. އޭނާގެ މައްޗަށް ކުރަނީ އެނގިހުރެ މީހަކު މެރުމުގެ ކުށުގެ ދައުވާއެވެ.
